અમદાવાદમાં કોરોનાની ફ્રીમાં સારવાર આપતી ખાનગી હોસ્પિટલોની સંખ્યા હવે ઘટશે!

અમદાવાદ: શહેરમાં કોરોનાના કેસ હવે ઘટી રહ્યા છે, ત્યારે દર્દીઓની સારવાર માટે કોર્પોરેશન દ્વારા સંપાદિત કરવામાં આવેલી ખાનગી હોસ્પિટલોની સંખ્યા ઘટાડવા હિલચાલ શરુ થઈ છે. સ્થાનિક અખબાર નવગુજરાત સમયના અહેવાલ અનુસાર, 20 ઓગસ્ટથી આ અંગેનો આખરી નિર્ણય કરી તેનો અમલ શરુ કરાય તેવી શક્યતા છે.

એક સમયે ગુજરાતના હોટસ્પોટ બની ગયેલા અમદાવાદમાં કોરોનાના કેસોમાં અચાનક ખૂબ જ મોટો ઉછાળો થતાં સરકારી હોસ્પિટલો ફુલ થઈ ગઈ હતી. તેવા સમયે ગરીબ દર્દીઓને સારવાર મળી રહે તે માટે કોર્પોરેશન દ્વારા ખાનગી હોસ્પિટલોને સંપાદિત કરવામાં આવી હતી. જો કે હવે અમદાવાદમાં સ્થિતિ ઘણેખરે અંશે કાબૂમાં આવી ગઈ છે, અને કેસોની સંખ્યા ઘટવાની સાથે રિકવરી રેટ પણ વધી રહ્યો છે.

આ પણ વાંચો: અમદાવાદમાં ICU કેરની જરૂર ધરાવતા કોવિડ-19ના દર્દીઓની સંખ્યામાં વધારો

હાલની સ્થિતિમાં મોટાભાગના દર્દીઓને ઘરે જ ક્વોરન્ટાઈન કરવામાં આવે છે. જો તેમની હાલત ગંભીર હોય તો જ તેમને હોસ્પિટલમાં ખસેડાય છે. દર્દીઓની સંખ્યા ઘટતા હવે સરકારી હોસ્પિટલો પરનો ભાર હળવો થયો છે. જેથી હવે કોર્પોરેશન દ્વારા સંપાદિત કરાયેલી ખાનગી હોસ્પિટલોની સંખ્યા ઘટાડાશે તે નિશ્ચિત મનાઈ રહ્યું છે. જો દર્દીની હાલત ગંભીર હોય તો તેને સિવિલ કે એસવીપીમાં ખસેડવામાં આવશે.

અમદાવાદની 63 જેટલી પ્રાઈવેટ હોસ્પિટલોના અડધા બેડ કોર્પોરેશન દ્વારા હસ્તગત કરવામાં આવ્યા છે. જેમાં જો બેડ પર દર્દી હોય કે ના હોય, તેનો નિશ્ચિત ચાર્જ કોર્પોરેશન દ્વારા ચૂકવવામાં આવી રહ્યા છે. જો ખાનગી હોસ્પિટલોની સંખ્યા ઘટાડાય તો કોર્પોરેશન પર આર્થિક બોજ પણ હળવો થઈ શકે છે. હાલ આ અંગે કોઈ સત્તાવાર નિર્ણય નથી લેવાયો. વર્તમાન સ્થિતિની સમીક્ષા અને ઉચ્ચ સ્તરે ચર્ચા બાદ જ આ અંગેની જાહેરાત થઈ શકે છે.

ઉલ્લેખનીય છે કે, એપ્રિલથી જૂનના ગાળામાં અમદાવાદમાં કોરોના ફાટી નીકળ્યો હતો. જેના કારણે સિવિલ તેમજ એસવીપી હોસ્પિટલો ફુલ થઈ ગઈ હતી. પ્રાઈવેટ હોસ્પિટલોના ચાર્જ પોસાય તેવા ના હોવાથી ગરીબ દર્દીઓની હાલત કફોડી બની હતી. તેવામાં કોર્પોરેશન દ્વારા શહેરની ખાનગી હોસ્પિટલોમાં બેડ સંપાદિત કરાયા હતા.