અચ્છે દિન: અમદાવાદમાં ઓફિસ સ્પેસની ખપતમાં 27 ટકાનો ઉછાળો

નવગુજરાત સમય > અમદાવાદ

દેશમાં કારોબારના માહોલમાં સુધારો થવાના પગલે ઓફિસ સ્પેસની માગમાં પણ વધારો જોવાયો છે. જાન્યુઆરી-જૂનના સમયગાળા દરમિયાન દેશના અમદાવાદ સહિતના ટોચના ૮ શહેરો પૈકી હૈદરાબાદમાં ઓફિસ સ્પેસની ખપતમાં સૌથી વધુ પંચાવન ટકાનો ઉછાળો જોવાયો હતો. અમદાવાદમાં આ સમયગાળા દરમિયાન ઓફિસ સ્પેસની ખપતમાં ગત વર્ષની તુલનાએ ૨૭ ટકાનો વધારો જોવાયો હતો.

રિઆલ્ટી કન્સલ્ટન્ટ કુશમેન એન્ડ વેકફિલ્ડના એક અહેવાલમાં જણાવ્યા અનુસાર કેલેન્ડર વર્ષ ૨૦૧૬ના પ્રથમ અર્ધવાર્ષિક ગાળામાં હૈદરાબાદમાં ઓફિસ સ્પેસ લીઝિંગ વધીને ૨૯ લાખ સ્ક્વેર ફીટ નોંધાયું હતું. જે ગત વર્ષ સમાન સમયગાળામાં ૧૯ લાખ સ્ક્વેર ફીટ રહેવા પામ્યું હતું.

ઓફિસ સ્પેસની ખપતમાં જોવાયેલા સૌથી નોંધપાત્ર વધારાની દૃષ્ટિએ પંચાવન ટકા સાથે પ્રથમ ક્રમે રહેલાં હૈદરાબાદ પછીના ક્રમે દિલ્હી-એનસીઆર (૩૯ ટકા), અમદાવાદ (૨૭ ટકા), કોલકાતા (૧૦ ટકા)નો સમાવેશ થાય છે. જોકે ચેન્નઈ (-૫૧ ટકા), પૂણે (-૪૧ ટકા), મુંબઈ (-૩૬ ટકા) તથા બેંગાલુરૂ (-૩૪ ટકા)માં કુલ ઓફિસ સ્પેસ લીઝિંગમાં સમીક્ષાના સમયગાળા દરમિયાન ઘટાડો જોવાયો હતો.