ગુજરાતમાં મંગળવારે કોરોનાના 41,647 ટેસ્ટ થયા છતાં અન્ય રાજ્યો કરતાં પાછળ

અમદાવાદઃ ગુજરાતમાં મંગળવારે કોવિડ 19ના સૌથી વધારે 41,647 કરવામાં આવ્યા. જેમાં એન્ટીજેન (Ag) અને રિવર્સ ટ્રાન્સક્રિપ્શન પોલિમરેસ ચેન રિએક્શન (RT-PCR)નો સમાવેશ થાય છે.

મંગળવારે કોવિડ-19ની સ્થિતિની સમીક્ષા કરવા વડાપ્રધાન નરેન્દ્ર મોદીની અધ્યક્ષતામાં બેઠક યોજાઈ હતી. જેમાં તેમણે કહ્યું હતું કે, બિહાર, ઉત્તરપ્રદેશ, તેલંગાણા અને પશ્ચિમ બંગાળ સહિત ગુજરાતે પણ કોવિડ-19ના ટેસ્ટિંગની સંખ્યા વધારવાની જરૂર છે.

એક સત્તાવાર જાહેરાત મુજબ, ગુજરાતના મુખ્યમંત્રી વિજય રૂપાણીએ જણાવ્યું હતું કે, ગુજરાતે 10 લાખથી વધુ લોકોના ટેસ્ટ કર્યા છે અને રોજ 10 લાખે 456 લોકોનું ટેસ્ટિંગ કરવામાં આવે છે. મુખ્યમંત્રીએ તેમ પણ કહ્યું હતું કે, રાજ્ય પાસે હવે ટેસ્ટિંગ માટે કુલ 59 સરકારી અને ખાનગી લેબ છે. છેલ્લા એક મહિનામાં, ટેસ્ટિંગ વધારવા માટે રાજ્યમાં Ag ટેસ્ટિંગ પણ કરવામાં આવ્યા છે.

કોવિડ-19ના ટેસ્ટિંગના આંકડાઓનું વિશ્લેષણ દર્શાવે છે કે, સૌથી વધારે કોવિડ-19ના કેસ ધરાવતા 10 રાજ્યોમાં ગુજરાત વર્તમાનમાં 73,238 કેસ સાથે 10મા ક્રમે છે. જ્યારે દર 10 લાખે 15,586 ટેસ્ટિંગ સાથે સાતમા ક્રમે છે.

છેલ્લા 22 દિવસમાં ગુજરાતમાં ટેસ્ટિંગમાં વધારો જોવા મળ્યો છે. 1થી 15 જુલાઈ દરમિયાન ગુજરાતમાં દરરોજ સરારેશ 7,603 ટેસ્ટિંગ કરવામાં આવી રહ્યા હતા, જે અડધા મહિના બાદ વધીને 17,317 પર પહોંચી ગયા છે. ઓગસ્ટ મહિનાના પહેલા 11 દિવસમાં ગુજરાતમાં સરેરાશ 26,138 ટેસ્ટિંગ કરવામાં આવી રહ્યા છે.

વારંવાર ગુજરાતની ટેસ્ટિંગ પોલીસી શંકાના ઘેરામાં આવતી રહે છે, ખાસ કરીને શરુઆતના મહિનાઓમાં ટેસ્ટિંગ પરના પ્રતિબંધો વિશે, જ્યારે ખાનગી લેબમાં ટેસ્ટિંગ માટે સરકારની મંજૂરીની જરૂર હતી. આરોગ્ય વિભાગના ઉચ્ચ અધિકારીઓએ ગુજરાત હાઈકોર્ટમાં ICMR ગાઈડલાઈનને ટાંકીને આ પગલાનો બચાવ કર્યો હતો. અનેક મેડિકલ બોડીએ ટેસ્ટિંગમાં વધારો કરવા અને તેને ફ્રીમાં ઉપલબ્ધ કરાવવા રાજ્ય સરકારને રજૂઆતો કરી હતી