અમદાવાદ: પોપ્યુલર ગ્રુપના બંધુઓ રમણ-દશરથ પટેલ સામે વધુ એક ફરિયાદ

અમદાવાદ: મંગળવારે પેઇન્ટ મેન્યુફેક્ચરરે પોપ્યુલર ગ્રુપના રમણ પટેલ અને ભાઇ દશરથ પટેલ વિરુદ્ધ એસજી હાઈવે રોડ પર એક કમર્શિયલ બિલ્ડિંગમાં ગેરકાયદેસર રીતે 3 કરોડની મિલકત પચાવી હોવાની ફરિયાદ નોંધાવતાં બિલ્ડર બંધુઓની મુશ્કેલીમાં વધારો થયો છે. જણાવી દઈએ કે, પોપ્યુલર ગ્રુપના રમણ અને દશરથ પટેલા સામે છેલ્લા ઘણા સમયથી એક પછી એક ફરિયાદો નોંધાઈ રહી છે. ત્યારે હવે 70 વર્ષીય વ્યક્તિએ તેમની 3 કરોડ રૂપિયાની મિલકત પચાવી પાડ્યા અંગે બંને ભાઈઓ સામે વસ્ત્રાપુર પોલીસ સ્ટેશનમાં ફરિયાદ નોંધાવી છે.

3 કરોડની મિલકત પચાવ્યાનો આક્ષેપ
મીડિયા રિપોર્ટ મુજબ સાયન્સ સિટી રોડ પર રહેતા અને સાંતેજમાં ગુંજન પેઈન્ટ કંપની ચલાવતા 70 વર્ષીય ગોવિંદભાઈ ડાહ્યાભાઈ બારોટે રમણ પટેલ અને દશરથ પટેલ સામે નોંધાવેલી ફરિયાદ મુજબ વર્ષ 1998માં તેમણે વસ્ત્રાપુરમાં ન્યૂયોર્ક ટાવરના આઠમા માળે 2950 ચો.ફૂટની જગ્યા ખરીદીને ત્યાં ઓફિસ શરૂ કરી હતી. વર્ષ 2010માં ઓફિસ ખાલી હોવાથી બિલ્ડર રમેશ અને દશરથ તેમની પાસે આવ્યા અને ઓફિસ ભાડે જોઈતી હોવાનું તથા વર્ષે 15 ટકાનો ભાડા વધારો જેવી વાત કરતા 11 મહિના 29 દિવસનો કરાર કર્યો હતો. કરાર પૂરો થયા બાદ પણ તેઓ કબજો ખાલી ન કરતો ગોવિંદભાઈએ વકીલ મારફતે નોટિસ મોકલાવી હતી.

ઓફિસ ભાડે લીધી અને કબજો કરી લીધો
જોકે, બાદમાં બંને ભાઈઓએ ફરીથી આજીજી કરીને એક વર્ષ માટે ફરીથી ભાડા કરાર કરાવ્યો હતો. ફરી એક વર્ષ પૂરું થતા ઓફિસ ખાલી કરવાનું કહેતા તેઓએ ગાળો બોલી ઓફિસ અમારી છે અને અહીંયા પગ મુકશો તો જાનથી મારી નાખીશ તેવી ધમકી આપી હતી. જેથી ગોવિંદભાઈએ 2010થી રૂ.3 કરોડની ગણાતી ઓફિસ પચાવી પાડી હોવાની પોલીસમાં ફરિયાદ નોંધાવી છે.

વસ્ત્રાપુર પોલીસ સ્ટેશનમાં નોંધાઈ ફરિયાદ
મીડિયા રિપોર્ટ મુજબ ગોવિંદભાઈએ ઓફિસ માટે લોન લીધી હતી, બંને ભાઈને આ વાતની જાણ થતાં તેઓ બેકમાં એક પત્ર લખી ખોટી જાણ કરી હતી કે આ ઓફિસ લાંબા સમય સુધી તેઓએ ભાડે રાખી છે. 3 કરોડની કિંમતની ઓફિસ પચાવી પાડવા માટે તેઓએ ધમકી આપી કબજો લઈ લેતા વસ્ત્રાપુર વસ્ત્રાપુર પોલીસે ગુનો નોંધી તપાસ શરૂ કરી છે.