RTOમાં ડ્રાઇવિંગ ટેસ્ટ ટ્રેક બંધ કરી દેવાતાં હોબાળો: પોલીસ બોલાવવી પડી

નવગુજરાત સમય > અમદાવાદ

અમદાવાદ આરટીઓ કચેરીમાં ડ્રાઈવિંગ ટેસ્ટ ટ્રેક પર લોકોને પડતી હાલાકીના મુદ્દે મોટર ડ્રાઈવિંગ એસો. દ્વારા શુક્રવારે ડ્રાઈવિંગ ટેસ્ટ ટ્રેક બંધ કરી દેતા ભારે હોબાળો થયો હતો. આરટીઓની કામગીરી શરૂ થયા બાદ પણ ડ્રાઈવિંગ ટેસ્ટ ટ્રેક પર ટેસ્ટ લેવાની કામગીરી બંધ કરી દેવાતા લોકોની લાંબી કતારો લાગી ગઈ હતી. જેના પગલે આરટીઓ દ્વારા પોલીસને બોલાવવામાં આવી હતી. એસોસિયેશન દ્વારા ૧૦ ઓગસ્ટથી અચોક્કસ મુદ્દત માટે રાજ્યના તમામ ડ્રાઈવિંગ ટેસ્ટ ટ્રેક બંધ કરવાની ચીમકી ઉચ્ચારવામાં આવી છે.

અમદાવાદ આરટીઓના ડ્રાઈવિંગ ટેસ્ટ ટ્રેકની ફરતે પતરા લગાવી દેવાયા છે. ઉપરાંત રિવર્સમાં ગાડી બહાર કાઢવાની ટેસ્ટમાં સેન્સરના પોલ ઊભા હતા તેને આડા કરી દેતા અનેક લોકો ત્યાં નાપાસ થાય છે. જ્યારે વાહન પાર્ક કરવાના ટેસ્ટમાં સ્પેસ ઓછી હોવાથી પણ લોકો નાપાસ થતા હતા. ઉપરાંત લોકો વીડિયો જોઈ ટેસ્ટની તૈયારી કરી શકે તે વીડિયો પણ ગાંધીનગર આરટીઓનો હતો. આ ઉપરાંત એક ટેસ્ટનો સમય ૧૨૦ સેકન્ડની ઘટાડી ૯૦ સેકન્ડ કરી દેવાયો હતો. ઉપરાંત નાપાસ થયેલા લોકોને બીજી વાર વહેલી એપોઈન્ટમેન્ટ મળતી ન હોવા સહિતના મુદ્દે અનેક રજૂઆતો બાદ પણ કોઈ નક્કર નિર્ણય લેવાયો ન હતો.

દરમિયાન મોટર ડ્રાઈવિંગ એસો. દ્વારા ડ્રાઈવિંગ ટેસ્ટ ટ્રેકમાં લોકોને પડતી હાલાકીના મુદ્દે શુક્રવારે ડ્રાઈવિંગ ટેસ્ટ ટ્રેક જ બંધ કરી દેવાનો નિર્ણય લીધો હતો. જેના ભાગરૂપે શુક્રવારે આરટીઓની કામગીરી શરૂ થઈ ત્યારે એસો.ના માણસોએ ફોર વ્હીલર અને ટુ વ્હીલરના ડ્રાઈવિંગ ટેસ્ટ ટ્રેકમાં કોઈને ટેસ્ટ આપવા માટે જવા દીધા ન હતા. બીજી બાજુ આરટીઓ સત્તાધીશોએ એસો. દ્વારા ટ્રેક બંધ કરી દેવાતા પોલીસ બોલાવી હતી અને પોલીસે એસો.ના અધિકારીઓને સમજાવ્યા બાદ બપોરે દોઢ વાગ્યે ટ્રેક શરૂ કરવામાં આવ્યા હતા.

જોકે ત્યારબાદ બપોરે એસો.ના પ્રમુખ હરીશ પટેલ, ડ્રાઈવિંગ ટેસ્ટ ટ્રેકના કોન્ટ્રાક્ટર તથા આરટીઓ સાથે બેઠક થઈ હતી. જેમાં ટેસ્ટ ટ્રેકની ફરતેથી પતરા હટાવી લેવાનો નિર્ણય લેવાયો હતો.

ઉપરાંત રિવર્સ ગાડી કાઢવાના ટેસ્ટમાં પોલ આડા કરી દેવાયા હતા તે ફરી સીધા કરી દેવાનો નિર્ણય લેવાયો હતો. જ્યારે પાર્કિંગ માટે ટેસ્ટ ટ્રેકમાં જગ્યા ઓછી હતી તે વધારવાનું પણ નક્કી કરાયું છે અને લોકો માટે અમદાવાદના ટેસ્ટ ટ્રેકનો જ વિડીયો દર્શાવવાનું નક્કી કરાયું છે. એસો.ના પ્રમુખ હરીશ પટેલે જણાવ્યું હતું કે, અમારી તમામ માંગણીઓ નહીં સંતોષાય તો ૧૦ ઓગસ્ટથી અચોક્કસ મુદ્દત માટે રાજ્યના તમામ ડ્રાઈવિંગ ટેસ્ટ ટ્રેક બંધ કરી દેવામાં આવશે.