ચોરવાડ નગરપાલિકાના કોંગી પ્રમુખને સસ્પેન્ડ કરવાનો મામલો હાઇકોર્ટ પહોંચ્યો

> સમૂહ લગ્નમાં બેડા દાનમાં આપવાનો નિર્ણય જનરલ બોર્ડનો અને ભોગ માત્ર પ્રમુખનો લેવાયાનો આક્ષેપ

નવગુજરાત સમય > અમદાવાદ

ચોરવાડ નગરપાલિકાએ કન્યાદાન માટે આપેલા બેડાના પ્રકરણમાં સ્થાનિક પાલિકા પ્રમુખને સસ્પેન્ડ કરવાના મામલે હાઇકોર્ટેમાં પહોંચ્યો છે. આ મામલે કોર્ટમાં બન્ને પક્ષોની દલીલો પૂર્ણ થતાં કોર્ટે ચુકાદો અનામત રાખ્યો છે.

ચોરવાડ નગરપાલિકા (જુનાગઢ જિલ્લો)ના પ્રમુખ વિમલ ચુડાસમાએ તેમના સસ્પેન્સનને હાઇકોર્ટમાં પડકાર્યું છે. વિમલ ચુડાસમાના એડવોકેટ બી. એમ. માંગુકીયાએ એવી દલીલ કરી હતી કે, સમૂહલગ્નમાં ભેટની પરંપરા તેમના પૂર્વ ચેરમેન રાજેશ ચુડાસમાના સમયથી ચાલી રહી છે. જોકે તે સમયે મ્યુનિસિપાલિટી ડાયરેક્ટરને કયારેય અયોગ્ય વર્તન લાગ્યું ન હતું. માત્ર હું કોગ્રેસ પાર્ટીનો સભ્ય છું અને ઉપર ભાજપાની સત્તા છે માટે મને બલીનો બકરો બનાવવામાં આવી રહ્યો છે. ભેટ આપવાનો સંપૂર્ણ નિર્ણય જનરલ બોર્ડની મીટિંગમાં લેવામાં આવ્યો હતો. જોકે અયોગ્ય વર્તન હોય તો નગરપાલિકાના તમામ સભ્યોને સસ્પેન્ડ કરવા જોઇએ. માત્ર પ્રમુખ જ કેમ હોળીનું નાળીયેર બનાવવામાં આવે છે.

આ નિર્ણય લેતા પહેલા તેમને સાંભળવામાં પણ આવ્યા નથી તેઓ ડાયરેક્ટર સમક્ષ પોતાના વકીલ સાથે હાજર રહ્યા હતા. જોકે તેમને સાંભળવામાં આવ્યા ન હતા અને અચાનક 22મી ફેબ્રુઆરી 2016ના રોજ તેમને સસ્પન્ડ કરતો હુકમ કરી દેવામાં આવ્યો હતો. હાઇકોર્ટની સિંગલ બેંચે તેમને કેટલીક રાહત આપી પ્રમુખ પદે ચાલુ રાખવા આદેશ આપ્યો છે. જોકે તેઓ વહીવટી કામગારી ન કરી શકે તેવું ઠરાવ્યું છે. બીજી તરફ સરકાર તરફે એવી રજૂઆત કરાઈ હતી કે, જાહેરનાણાંને આ રીતે દાનમાં આપી શકાય નહીં. તમામ દલીલો ધ્યાને લઇ જસ્ટિસ આર.એચ.શુક્લએ કેસને ચુકાદા પર મુલતવી રાખ્યો છે.