એક સીટ પર એક જ પેસેન્જર ન પોસાતા ખાનગી લકઝરી બસોએ 25-30% ભાડું વધાર્યું!

અમદાવાદ: કોરોના મહામારી અને લોકડાઉનને કારણે લગભગ બધા સેક્ટરમાં ઊંચા પ્રમાણમાં આર્થિક નુકસાન થયું છે. ટ્રાન્સપોર્ટ વ્યવસાયને પણ ભારે આર્થિક ખોટ સહન કરવાનો વારો આવ્યો છે. કોરોનાના સંક્રમણને રોકવા માટે સરકારે માસ્ક અને સોશિયલ ડિસ્ટન્સિંગ ફરજિયાત બનાવ્યું છે. ત્યારે બસમાં મુસાફરી દરમિયાન એક સીટ પર એક જ મુસાફર બેસી શકે તેવી સૂચનાઓ આપવામાં આવી છે. મીડિયા રિપોર્ટ મુજબ એક સીટ પર એક જ મુસાફર ન પોસાતા ખાનગી લકઝરી બસોએ ભાડામાં 150થી 200 રૂપિયાનો વધારો કરી દીધો છે.

ક્યાં રૂટનું કેટલું ભાડું?
મીડિયા રિપોર્ટ મુજબ ખાનગી લકઝરી બસોએ અમદાવાદથી ભૂજનું ભાડું 600થી વધારીને 750, અમદાવાદથી સુરતનું ભાડું 300થી વધારીને 375, અમદાવાદથી અમરેલીનું ભાડું 250થી 350 જ્યારે અમદાવાદથી રાજકોટનું ભાડું 400થી વધારીને 600 રૂપિયા કરી દીધું છે. ભાડામાં 25થી 30 ટકાનો વધારો થતા મુસાફરોના ખિસ્સા પર આર્થિક ભારે પડ્યો છે અને પડ્યાં પર પાટું જેવી સ્થિતિ સર્જાઈ છે.

બસોના હપ્તા ભરવાનું મુશ્કેલ બન્યું
અખિલ ગુજરાત પ્રવાસી વાહન લકઝરી સંચાલક મંડળના ખજાનચીના જણાવ્યાનુસાર કોરોનાને કારણે મહારાષ્ટ્ર અને મધ્યપ્રદેશની બોર્ડરમાં લકઝરીનો પ્રવેશ બંધ છે. જ્યારે રાજસ્થાનમાં જોધપુર અને જયપુર સહિતના શહેરોમાં 15 ટકા લકઝરીની અવર-જવર છે. જોકે, ગુજરાતમાં મોટાભાગે તમામ રૂટ્સ પર ખાનગી બસો ચાલી રહી છે. પરંતુ તેમા મુસાફરોની ભીડ ઓછી હોવાથી બસો ખાલીખમ દોડી રહી છે. 36 સીટ પર 17-18 મુસાફરો બેસાડાય છે. ડીઝલ, ડ્રાઈવર-ક્લીનરનો ખર્ચ તો ઠીક બસના હપ્તા ભરવામાં પણ મુશ્કેલી પડી રહી છે.