દાદા બની હરખાયા મુકેશ અંબાણી, પૌત્ર સાથેની પહેલી સેલ્ફીમાં દેખાઈ ખુશી

મુંબઈ: કહેવાય છે કે મૂડી કરતા વ્યાજ વધારે વ્હાલું હોય છે. વ્યક્તિને જેટલી ખુશી પિતા બનીને મળે છે, તેનાથી વધારે ખુશી દાદા બનવા પર મળે છે. કંઈક આવી જ ખુશી દેશના સૌથી ધનવાન વ્યક્તિ મુકેશ અંબાણીના ચહેરા પર આજે જોવા મળી રહી છે. અંબાણી પરિવારની વહુ શ્લોકાએ આજે સવારે 11 વાગ્યે મુંબઈમાં દીકરાને જન્મ આપ્યો છે. મુકેશ અંબાણીએ પોતાની ત્રીજી પેઢીના સૌ પહેલા મેમ્બર સાથે પોતાની પહેલી સેલ્ફી લઈને આખી દુનિયા સાથે આગમનની ખુશી શેર કરી છે.

અંબાણી પરિવારનો હિસ્સો બનેલા આ સૌથી નાની વયના મેમ્બરને ખોળામાં લઈ દાદા મુકેશ અંબાણી કેટલા ખુશ છે તે તેમણે લીધેલી આ તસવીરમાં જ સ્પષ્ટ દેખાઈ આવે છે, અને તેનું વર્ણન કરવા માટે કદાચ શબ્દોની પણ કોઈ જરુર નથી. 63 વર્ષના મુકેશ અંબાણીના મોટા દીકરા આકાશ અંબાણીના લગ્ન શ્લોકા સાથે માર્ચ 2019માં થયા હતા. દુનિયાના સૌથી મોંઘા લગ્નોમાંના એક એવા આ લગ્ન સમગ્ર વિશ્વમાં ચર્ચાનો વિષય બન્યા હતા.

મુકેશ અંબાણીના દીકરા આકાશ અંબાણી રિલાયન્સ જિયોની એક્ઝિક્યુટિવ કમિટિના મેમ્બર છે, અને તેઓ કંપનીના ડિરેક્ટર હોવાની સાથે હેડ ઓફ સ્ટ્રેટેજીની પણ જવાબદારી સંભાળે છે. તેઓ રિલાયન્સ સાથે 2014માં જોડાયા હતા. આકાશ અંબાણી પ્રોડક્ટ ડેવલપમેન્ટ, મેસેજિંગ એન્ડ ચેટ તેમજ અન્ય ડિજિટલ સર્વિસનું કામકાજ જુએ છે. આ સિવાય IPLની મુંબઈ ઈન્ડિયન્સ ટીમના મેનેજમેન્ટમાં પણ તેમની સક્રિય ભૂમિકા છે. તેમણે બિઝનેસ એન્ડ ઈકોનોમિક્સમાં બ્રાઉન યુનિ.માંથી ઉચ્ચ અભ્યાસ કર્યો છે.

રિલાયન્સ ગ્રુપ હાલના સમયમાં ટેલીકોમ, ડેટા તેમજ રિટેઈલ સેક્ટરમાં પોતાનો પગપેસારો કરી રહ્યું છે, અને કંપનીના આ બિઝનેસમાં પાછલા કેટલાક મહિનામાં ફેસબુક, ગૂગલ સહિતના દેશવિદેશના મોટા-મોટા રોકાણકારોએ જંગી રોકાણ કર્યું છે. લોકડાઉન દરમિયાન થયેલા આ રોકાણથી રિલાયન્સનો શેર પણ જોરદાર ઉછળ્યો હતો. ઉલ્લેખનીય છે કે, મુકેશ અંબાણીએ તાજેતરમાં જ આવતા વર્ષના મધ્યમાં 5G લોન્ચ કરવાની પણ જાહેરાત કરી હતી.

રિલાયન્સના શેરમાં આવેલા ઉછાળાથી મુકેશ અંબાણીની વેલ્થમાં પણ જોરદાર વધારો થયો છે. તેમની ગણતરી દેશના સૌથી ધનવાન વ્યક્તિ તરીકે થાય છે, જ્યારે નવેમ્બરના આંકડા અનુસાર તેઓ દુનિયાના નવમા સૌથી ધનવાન વ્યક્તિ હતા. ફોર્બ્સના રિપોર્ટ અનુસાર, 2 નવેમ્બરના રોજ મુકેશ અંબાણીની નેટવર્થ 71.5 બિલિયન ડોલર હતી. ઉલ્લેખનીય છે કે, નવેમ્બર મહિનામાં જ રિલાયન્સના શેરમાં કડાકો બોલાતા અંબાણીની નેટવર્થ ઘટી હતી. તે પહેલા તેઓ વિશ્વના છઠ્ઠા સૌથી ધનવાન વ્યક્તિ હતા.