PSI શ્વેતા જાડેજા લાંચ કેસ: બનેવીએ અગાઉ પણ લાંચના રૂપિયા સ્વીકાર્યાની આશંકા

અમદાવાદ: 35 લાખના તોડ મામલે પીએસઆઈ શ્વેતા જાડેજાના બનેવી દેવેન્દ્ર ઓડેદરા શુક્રવારે અચાનક જ કોર્ટમાં સરેન્ડર થયો હતો. ત્યારબાદ કોર્ટે એસઓજીને તેની કસ્ટડી સોંપી હતી. શનિવારે દેવેન્દ્ર ઓડેદરાને પોલીસે રિમાન્ડ મેળવવા માટે કોર્ટમાં રજૂ કર્યો હતો. જ્યાં પોલીસને એવી આશંકા હતી કે, દેવેન્દ્રએ સહઆરોપી PSI શ્વેતા જાડેજાના કહેવા પર અગાઉ પણ લાંચના નાણાં સ્વીકાર્યા હશે. પોલીસે વિવિધ મુદ્દે તપાસ માટે દેવેન્દ્રના ચાર દિવસના રિમાન્ડ મેળવ્યા છે. પોલીસ આ અંગે આરોપીના વતન જઈને પણ તપાસ કરશે.

પોલીસ સૂત્રોએ જણાવ્યું કે, રિમાન્ડ દરમિયાન પોલીસ દેવેન્દ્રને તેના વતન જઈને પણ તપાસ કરશે. નોંધનીય છે કે, 35 લાખના મસમોટા લાંચ પ્રકરણમાં હજુ સુધી પોલીસ એક પણ રૂપિયો રિકવર કરી શકી નથી, ત્યારે દેવેન્દ્રના રિમાન્ડ દરમિયાન પોલીસ લાંચના પૈસા રિકવર કરી શકે છે કે કેમ તે જોવાનું રહ્યું. જણાવી દઈએ કે, લાંચ કેસમાં છેલ્લા ઘણા મહિનાથી ભાગેડુ PSI શ્વેતાના બનેવી દેવેન્દ્ર પોતાના વકીલ સાથે કોર્ટમાં હાજર થઈ ગયો હતો.

ત્યારબાદ એસઓજીને કસ્ટડી આપ્યા બાદ દેવેન્દ્રને રિમાન્ડ મેળવવા માટે રજૂ કરાયો હતો. મુખ્ય સરકારી વકીલ સુધીર બ્રહ્મભટ્ટે રિમાન્ડ અરરજી અંગે રજૂઆત કરી હતી કે, આરોપી ઘણા સમયથી નાસતો ફરતો હતો. દેવેન્દ્ર આ કેસમાં અગાઉ ઝડપાયેલા PSI શ્વેતા જાડેજાનો સગો બનેવી ઠે અને શ્વેતાએ એક વખત 30 લાખ ઇને બીજી વખત 10 લાખ મળી કુલ 40 લાખ આંગડિયા મારફતે મોકલાવ્યા હતા તે નાણાં દેવેન્દ્રએ સ્વીકાર્યા હતા તો તે રૂપિયા ક્યાં છે. તેથી ગુનાના કામે આરોપીને તેના વતન પ્રાસલા લઈ જવા પડે તેમ છે.

શું છે સમગ્ર કેસ?
કેનલ શાહ સામે 2017માં એક મહિલા કર્મચારીએ રેપ કેસ કર્યો હતો. ત્યારબાદ તેની સામે સેટેલાઈટ પોલીસ સ્ટેશનમાં સાક્ષીને ધમકાવવા અંગે ફરિયાદ થઈ હતી. કેનલ સામેના રેપ કેસની તપાસ શ્વેતા જાડેજા પાસે હતી. જેમાં કેનલને પાસા હેઠળ પૂરી દેવાની ધમકી આપી 35 લાખની ડિમાન્ડ કરી હતી. કેનલે શ્વેતાને 20 લાખ ચૂકવી દીધા હતા, જ્યારે બાકીના 15 લાખ માટે શ્વેતા વ્હોટ્સએપ પર કોલ કરી કેનલને ધમકાવતી હતી. કેનલે પોતાની કંપનીના મહિલા કર્મચારી મારફતે આંગડિયા પેઢીમાં શ્વેતાના કહ્યા અનુસાર રુપિયા મોકલ્યા હતા. આમ, શ્વેતા વતી તેના બનેવી દેવેન્દ્રએ 35 લાખ સ્વીકાર્યા હતા.