નવા નરોડામાં રહેતા ક્લાસ વન અધિકારી અને DCP ઓફિસ કર્મીનો પરિવાર ઝઘડ્યો

અમદાવાદ: શહેરના નવા નરોડા વિસ્તારમાં રહેતા ક્લાસ વન અધિકારી અને DCP ઓફિસકર્મીના પરિવાર વચ્ચે ઝઘડો થતાં બંને પરિવારોએ કૃષ્ણનગર પોલીસ સ્ટેશનમાં ફરિયાદ નોંધાવી છે. પોલીસે બંને પક્ષોની ફરિયાદના આધારે સામસામે છેડતી અને ધાકધમકી સહિતનો ગુનો નોંધીને આગળની તપાસ હાથ ધરી છે.

ક્લાન વન અધિકારી અને DCP પોલીસકર્મીનો પરિવાર ઝઘડ્યો
નવા નરોડામાં 47 વર્ષીય મહિલા તેના પતિ અને બાળકો સાથે રહે છે. પતિ પોલીસ ડિપાર્ટમેન્ટ ઝોન 6માં ફરજ બજાવે છે. મહિલાના ઘરની પાડોશમાં રહેતા યુવક અવાર નવાર મહિલાની પાસે આવીને તારા પતિ તો પોલીસમાં છે અને હું ક્લાસ વનઅધિકારી છું જેથી તું મારી સાથે આવી જા તેમ કહીને હેરાન કરતા હતા. ગઇકાલે મહિલા તેના ઘરે હાજર હતી ત્યારે આ યુવક તથા તેની પત્ની મહિલાને દીકરાને કચરો નાખવા માટે બોલાચાલી કરી અપમાનજનક શબ્દો બોલતા હતા. આ સમયે પાડોશી યુવક ઉશ્કેરાઈ ગયો હતો અને તલવાર લઈને આવ્યો હતો અને જાનથી મારી નાખવાની ધમકી આપતો હતો.

બંને પક્ષોએ કૃષ્ણનગર પોલીસ સ્ટેશનમાં સામસામે ફરિયાદ નોંધાવી
આ દરમિયાન મહિલાને જાણ થતા તેણે પોલીસ કંટ્રોલમાં ફોન કરી ઘટનાની જાણ કરી હતી. બાદમાં કૃષ્ણનગર પોલીસ સ્ટેશનમાં ફરિયાદ નોંધાવી હતી. બીજી તરફ પાડોશી મહિલાએ પણ ક્રોસ ફરિયાદ નોંધાવતા જણાવ્યું હતું કે, તે તેના પરિવાર સાથે ઘરે હજાર હતી અને કચરો નાખવા માટે બહાર આવી હતી ત્યારે પાડોશી યુવક ત્યાં ઊભો હતો અને તું મારી દીકરીનો પીછો કેમ કરે છે તેમ કહીને જાનથી મારી નાખવાની ધમકી આપતો હતો. મહિલાએ પોલીસ કંટ્રોલ રૂમમાં ફોન કર્યા બાદ કૃષ્ણનગર પોલીસ સ્ટેશનમાં પાડોશી યુવક સહિતના લોકો વિરુદ્ધ ફરિયાદ નોંધાવી હતી.