અમદાવાદમાં સાંજ પછી ધીમી ધારે વરસાદ શરૂ, વાતાવરણમાં ઠંડક પ્રસરી

અમદાવાદ: લાંબા સમયની રાહ જોયા પછી અમદાવાદમાં આજે સાંજ પછી અનેક વિસ્તારોમાં ધીમી ધારે વરસાદ શરૂ થયો છે. અમદાવાદમાં સાંજના સમય પછી વરસાદનું આગમન થતા વાતાવરણમાં ઠંડક પ્રસરી ગઈ છે. તહેવારોની સિઝન શરૂ થતા વરસાદના આગમન સાથે અમદાવાદીઓમાં ઉત્સાહ જોવા મળી રહ્યો છે. અહીં નોંધનીય છે કે રાજ્યમાં વરસાદને લઇ હવામાન વિભાગની આગાહી સામે આવી છે. જેમાં તારીખ 9 ઓગસ્ટથી રાજ્યમાં સાર્વત્રિક વરસાદ નોંધાશે તેવું જણાવવામાં આવ્યું છે.

હવામાન વિભાગે આગાહી કરતા કહ્યું કે તારીખ 9મી ઓગસ્ટે બંગાળની ખાડીમાં લૉ પ્રેશર સિસ્ટમ બની રહી છે અને તે આગામી દિવસોમાં અમદાવાદ, ગાંધીનગર અને વડોદરામાં વરસાદ લાવી શકે છે. રાજ્યમાં દક્ષિણ ગુજરાત અને સૌરાષ્ટ્રમાં સારો વરસાદ પડ્યો છે. ત્યારે હવામાન વિભાગે જણાવ્યું કે આજે પણ સૌરાષ્ટ્ર અને કચ્છમાં વરસાદ થઈ શકે છે. અમરેલી, ગીર-સોમનાથ અને પોરબંદરમાં ભારે વરસાદ થાય તેવી શક્યતા છે.

રાજ્યમાં 11 ઓગસ્ટ પછી એટલે કે જન્માષ્ટમીના દિવસથી આગામી 5 દિવસ સુધી ભારેથી અતિભારે વરસાદ થવાની આગાહી વ્યક્ત કરવામાં આવી છે. રિપોર્ટ્સ મુજબ સાઈક્લોનિક સર્ક્યુલેશનની અસરના કારણે રાજ્યમાં અતિભારે વરસાદ થવાની સંભાવના વ્યક્ત કરવામાં આવી છે. આ સમયગાળા દરમિયાન સારા પ્રમાણમાં વરસાદ થવાની આગાહી વ્યક્ત કરવામાં આવી છે.

જન્માષ્ટમીથી 5 દિવસ સુધી ભારે વરસાદની આગાહી વ્યક્ત કરવામાં આવી છે જેમાં અમદાવાદ સહિત વડોદરા, મધ્ય ગુજરાત, ઉત્તર ગુજરાતમાં પણ સારા પ્રમાણમાં વરસાદ થવાની સંભાવના વ્યક્ત કરવામાં આવી છે. મહત્વનું છે કે, પાછલા કેટલાક દિવસથી સૌરાષ્ટ્ર તથા મધ્ય ગુજરાતમાં કેટલાક ઠેકાણે સારા પ્રમાણમાં વરસાદ નોંધાયો છે.