અમદાવાદમાં ભારે પવન સાથે વરસાદ, ઠેર-ઠેર પાણી ભરાયાં

I am Gujarat

બપોરે ભારે પવન સાથે વરસાદ ખાબક્યો

અમદાવાદ: અમદાવાદના મોટાભાગના વિસ્તારોમાં સોમવારે બપોરે તોફાની પવન અને વાદળોના ગડગડાટ વચ્ચે વરસાદ પડવાનું શરૂ થઈ ગયું હતું. વરસાદ એટલો પૂરજોરમાં પડ્યો હતો કે, ઠેર-ઠેર પાણી ભરાઈ ગયા હતા. શહેરના પૂર્વમાં વસ્ત્રાલ, નરોડા, નારોલ, રખિયાલ, બાપુનગર, ઓઢવ, સીટીએમ તેમજ કોટ વિસ્તાર અને પશ્વિમમાં પાલડી, આશ્રમ રોડ, નારણપુરા, રાણીપ, ઘાટલોડિયા, એસજી હાઈવે સહિતના વિસ્તારોમાં વરસાદ પડ્યો હતો. શહેરના જમાલપુર, પાલડી, અંજલિ, વાસણા, ગોમતીપુર, ગીતામંદિર સહિતના વિસ્તારોમાં તો ભારે વરસાદને પગલે ટ્રાફિકજામની સ્થિતિ સર્જાઈ હતી.

પાંચ દિવસમાં ભારે વરસાદની આગાહી

દરમિયાન હવામાન વિભાગે આગામી પાંચ દિવસમાં સમગ્ર રાજ્યમાં ભારે વરસાદની આગાહી કરી છે. મધ્ય અને દક્ષિણ ગુજરાતમાં 31 ઓગસ્ટ સુધી ભારે વરસાદની આગાહી છે. છેલ્લા બે દિવસથી વિવિધ ભાગોમા છૂટાછવાયા વરસાદી ઝાપટાં પડી રહ્યાં છે. ત્યારે તાજેતરમાં બંગાળાની ખાડીમાં અપર એર સાયક્લોનિક સર્ક્યુલેશન સિસ્ટમ અને લો-પ્રેશર થતા વરસાદી સિસ્ટમ સર્જાઈ છે. જે ગુજરાત તરફ આગળ વધવાની શક્યતાઓ રહેલી છે.

પહેલા તબક્કાની તબાહી હજુ ભૂલાઈ નથી

વરસાદ પડતા પહેલા આવું અંધારું છવાઈ ગયું હતું. ઉલ્લેખનીય છે કે, પ્રથમ તબક્કામાં રાજ્યમાં પડેલા વરસાદે ભારે તબાહી સર્જાઈ હતી. બનાસકાંઠા જિલ્લાના કેટલાક ગામોમાં તો મહિના ઉપરનો સમય થવા છતાં પાણી ઉતર્યા નથી. ગઈકાલે પણ સૌરાષ્ટ્રમાં ભારે ગાજવીજ સાથે વરસાદ ખાબક્યો હતો. જેમાં વીજળી પડતાં અમરેલીના ગાજેપરા ગામના રહેવાસી વિક્રમ થળેસાનું મોત નીપજ્યું હતું.