સુપ્રીમ કોર્ટે ફગાવી ચુડાસમાની અરજી, ચૂંટણીમાં મળેલી જીત પર થશે સુનાવણી

I am Gujarat

શિક્ષણ મંત્રીની વધી મુશ્કેલીઓ

TNN, અમદાવાદઃ રાજ્યના શિક્ષણ મંત્રી ભૂપેન્દ્રસિંહ ચુડાસમાની મુશ્કેલીઓમાં વધારો થતો હોય તેવું લાગી રહ્યું છે. સોમવારે તેમની વિરુદ્ધ હાઈકોર્ટમાં થયેલી પીટિશનને ફગાવી દેવાની અરજી સુપ્રીમ કોર્ટે નકારી દીધી છે. કોંગ્રેસના ધોળકાના ઉમેદવારે 2017ની વિધાનસભા ચૂંટણીમાં ચુડાસમાની નજીવા વોટ દ્વારા થયેલી જીતને પડકારતી અરજી હાઈકોર્ટમાં કરી હતી.

સુપ્રીમ કોર્ટે ફગાવી અરજી

પાછલા મહિને ગુજરાત હાઈકોર્ટે ચુડાસમાની અરજી રદ કરી હતી, જેના કારણે તેમણે સુપ્રીમ કોર્ટ સુધી જવું પડ્યું. ન્યાયમૂર્તિ એ.કે સિકરી અને ન્યાયમૂર્તિ આર. એસ રેડ્ડીની બનેલી ખંડપીઠમાં સોમવારે તેમની અરજી ફગાવી દેવામાં આવી. જેના કારણે કોંગ્રેસના ઉમેદવાર અશ્વીન રાઠોડની ચુડાસમાના 327 વોટ દ્વારા જીતના પડકારને ટ્રાયલનો માર્ગ મોકળો બન્યો છે. જેમાં એવું માનવામાં આવે છે કે આ વિજય ગેરરીતિ પૂર્વક થયો છે.

કોંગ્રેસના ઉમેદવારે હાઈકોર્ટમાં કરી હતી અરજી

હાઈકોર્ટે એમ કહેતા ચુડાસમાની અરજી રદ કરી હતી કે, રાઠોડના અરજીમાં રહેલા ત્રણ આરોપોની તપાસ થવી જોઈએ. રાઠોડે પોતાની અરજીમાં જણાવ્યું હતું કે ચુડાસમાનો વિજય માત્ર 327 વોટોથી થયો છે. જ્યારે ચૂંટણી અધિકારીએ રહસ્યમયી રીતે 429 જેટલા વોટ પોસ્ટલ બેલેટ દ્વારા નકારી કાઢ્યા હતા. આમ નકારેલા વોટોની સંખ્યા વિજય કરતા વધારે છે.

ચૂંટણી જીતવા ગેરરીતિ કરી હોવાનો આક્ષેપ

રાઠોડે એવો પણ આરોપ લગાવ્યો હતો કે ચૂંટણી સમયે કોડ ઓફ કન્ડક્ટ લાગુ કરાયા બાદ ધોળકાના ડેપ્યુટી કલેક્ટર ગૌરાંગ પ્રજાપતિને ટ્રાન્સફર કરી દેવામાં આવ્યા. તેમના સ્થાને ધવલ જાનીને લાવવામાં આવ્યા, જેનો હેતુ ચુડાસમાને ચૂંટણી જીતાડવાનો હતો.

ખોટી રીતે થઈ વોટોની ગણતરી

ત્રીજા આરોપમાં કોંગ્રેસના ઉમેદવારે કહ્યું હતું કે, ધોળકામાં વોટિંગ કાઉન્ટીંગની પદ્ધતિમાં ચૂંટણી અધિકારીઓએ ઈલેક્શન કમિશન ઓફ ઈન્ડિયાના આદેશનું ઉલ્લંઘન કર્યું હતું. જે મુજબ સૌ પ્રથમ બેલેટ પેપર કાઉન્ટિંગ થવા જોઈએ અને બાદમાં EVM. જ્યારે અહીં ચૂંટણી અધિકારીઓએ સૌ પ્રથમ EVM વોટ્સ ગણવાનું શરૂ કર્યું જેથી જાણ થઈ કે કોંગ્રેસ અને બીજેપીના ઉમેદવાર વચ્ચે વોટોનું અંતર ઓછું છે, ત્યાર બાદ બેલેટ બોક્સ ખોલવામાં આવ્યા.