લાંબા બ્રેક બાદ આખરે સીપ્લેન રિવરફ્રંટ આવી પહોંચ્યું, કાલથી શરુ થશે સર્વિસ

અમદાવાદ: રિવરફ્રંટથી સ્ટેચ્યુ ઓફ યુનિટી વચ્ચે પીએમ મોદીએ શરુ કરાવેલી સીપ્લેન સર્વિસ લાંબા બ્રેક બાદ આવતીકાલથી ફરી શરુ થવા જઈ રહી છે. મેઈન્ટેનન્સ માટે માલદિવ્સ ગયેલા સીપ્લેન આજે સાંજે ગુજરાત આવી પહોંચ્યા છે, જેમાં એક એરક્રાફ્ટનું સાબરમતી નદીમાં લેન્ડિંગ થયું હતું. ઉલ્લેખનીય છે કે, પીએમે શરુ કરાવ્યાના થોડા જ દિવસમાં ડચકા ખાતી થઈ ગયેલી સીપ્લેન સેવા લાંબા સમય માટે બંધ થઈ જતાં તેના પર અનેક સવાલ ઉઠી રહ્યા હતા.

થોડા સમય સીપ્લેનની સર્વિસ ચાલ્યા બાદ બંને એરક્રાફ્ટને મેઈન્ટેનન્સ માટે માલદિવ્સ મોકલવામાં આવ્યા હતા. રિવરફ્રંટ કે પછી કેવડિયામાં તેની સવલત ના હોવાના કારણે પ્લેનને માલદિવ્સ મોકલવા જરુરી હતા. જોકે, 50 દિવસના ગાળામાં માંડ 24 દિવસ ચાલેલી સીપ્લેન સર્વિસનું બુકિંગ 20 ડિસેમ્બરથી ફરી શરુ થશે તેવી જાહેરાત બાદ પણ તેના કોઈ ઠેકાણા ના પડતા સીપ્લેન ફરી શરુ થશે કે કેમ તેવી ચર્ચા શરુ થઈ હતી.

વળી, મેઈન્ટેનન્સ માટે માલદિવ્સ ગયેલું એરક્રાફ્ટ ત્યાં ઉપયોગમાં લેવાઈ રહ્યું હોવાની વાત બહાર આવી હતી. સીપ્લેનને વારંવાર મેઈન્ટેનન્સ માટે છેક માલદિવ્સ મોકલવું અને ત્યાંથી પરત લાવવું તેનું સંચાલન કરતી કંપની માટે પણ મુશ્કેલ હોવાનું જાણવા મળતા સીપ્લેનના હાલ પણ રો-રો ફેરી જેવા થશે કે કેમ તેવી અટકળો શરુ થઈ હતી. જોકે, ત્યારબાદ એવા અહેવાલો પણ આવ્યા હતા કે સીપ્લેનનું ગુજરાતમાં જ મેઈન્ટેનન્સ થાય તેવી ફેસિલિટી ઉભી કરવામાં આવશે.

પ્રાપ્ત વિગતો અનુસાર, આવતીકાલથી જ સ્પાઈસજેટ દ્વારા રિવરફ્રંટથી SoU વચ્ચે સીપ્લેન સેવા ફરી શરુ થઈ જશે. www.spiceshuttle.com પર ઓનલાઈન બુકિંગ કરાવવા માટેના ઓપ્શન પણ આ લખાઈ રહ્યું છે ત્યારે ઉપલબ્ધ બતાવતા હતા. જે અનુસાર, 30 તારીખે સવારે 10 વાગ્યાની અને બપોરે દોઢ વાગ્યાની બે ફ્લાઈટ ઉપલબ્ધ હતી. સવારની 10 વાગ્યાની ફ્લાઈટનું ભાડું 4789 જ્યારે બપોરે દોઢ વાગ્યાની ફ્લાઈટનું ભાડું 3250 રુપિયા વેબસાઈટ પર બતાવતું હતું.

સીપ્લેન સેવા શરુ થઈ ત્યારે તેનું વન-વે ભાડું માત્ર 1500 રુપિયા રહેશે તેવી જોરશોરથી વાતો કરાઈ હતી. જોકે, સ્પાઈસજેટની વેબસાઈટમાં તેનું ઓછામાં ઓછું ભાડું 3250 રુપિયા જેટલું બતાવે છે. ઉલ્લેખનીય છે કે, જો થોડું એડવાન્સમાં બુકિંગ કરાવો તો આનાથી પણ સસ્તી ટિકિટ દિલ્હી કે મુંબઈ જવા માટે પણ મળી રહે. પરંતુ અમદાવાદથી કેવડિયા જવાનું ભાડું તેનાથી પણ વધારે છે.