પાનસરમાં ગૃહ મંત્રી અમિત શાહની સભામાં સાપ નીકળતા મચી અફરાતફરી

કેન્દ્રીય ગૃહ મંત્રી અમિત શાહ શુક્રવારે ગાંધીનગર આવ્યા હતા જ્યાં તેમણે વિવિધ કાર્યક્રમોમાં હાજરી આપી હતી. તેમણે પોતાના મત વિસ્તારના સઈજમાં શાળાનું લોકાર્પણ અને વૃક્ષારોપણ કર્યું હતું. ત્યાંથી તેઓ પાનસર ગયા હતા અને ત્યાં તળાવનું બ્યુટિફિકેશન કરવામાં આવ્યું છે તેનું પણ લોકાર્પણ કર્યું હતું. તેમની સાથે મુખ્યમંત્રી ભૂપેન્દ્ર પટેલ અને ગૃહરાજ્ય મંત્રી હર્ષ સંઘવી પણ હાજર રહ્યા હતા. હાલમાં ગુજરાતમાં નવરાત્રીનો તહેવાર ચાલી રહ્યો છે ત્યારે અમિત શાહે સૌ પ્રથમ બધા લોકોને નવરાત્રીની શુભેચ્છાઓ પાઠવી હતી.

આ દરમિયાન અમિત શાહની એક સભામાં અચાનક જ સાપ આવી ચડ્યો હતો જેના કારણે લોકોમાં અફરાતફરી મચી ગઈ હતી. સભામાં જ્યારે મુખ્યમંત્રી ભૂપેન્દ્ર પટેલ ભાષણ આપી રહ્યા હતા ત્યારે સાપ આવ્યો હતો જેના કારણે સભામાં પાછળની બાજુ બેઠેલા લોકોમાં ભાગદોડ જેવી સ્થિતિ સર્જાઈ હતી. લોકોએ બૂમાબૂમ કરીદીધી હતી. જોકે, ત્યાં હાજર પોલીસે સાપન પકડી લીધો હતો અને ત્યાંથી દૂર કરી દેવામાં આવ્યો હતો.
અમિત શાહે ગાંધીનગરમાં રેલવે સ્ટેશને મહિલા સ્વ સહાય જૂથ અંતર્ગત શરૂ કરવામાં આવેલા ટી-સ્ટોલનું લોકાર્પણ કર્યું હતું. તેમણે ઈલેક્ટ્રોનિક ચાકડાના વિતરણ માટે આહ્વાહન કર્યું હતું. તેમણે કહ્યું હતું કે, મોદી સાહેબે બધાની ચિંતા કરી છે અને આ ઈલેક્ટ્રોનિક ચાકડાથી તમે માટીની કલડીઓ બનાવજો. આ કુલડીઓ ખરીદવાની વ્યવસ્થા પણ થઈ જશે. આપણે રેલવેમાં પ્લાસ્ટિકના કપ બંધ કરાવી દઈશું જેનાથી પ્રદૂષણ ઓછું થઈ જશે અને તમને રોજગારી પણ મળશે.

તેમણે કહ્યું હતું કે, જે કોઈને આ ચાકડા જોઈતા હોય તેમણે કલેક્ટર કચેરીનો સંપર્ક કરવો. તમે તમારા પરિવારમાં પણ આ મેસેજ આપજો. તમે જે વસ્તુઓ બનાવશો તે ખરીદી લેવામાં આવશે. આજે કલેક્ટર સાહેબે 5,000 કુલડીઓનો ઓર્ડર આપ્યો છે. અમદાવાદ રેલવે સ્ટેશન પર પણ વાત થઈ ગઈ છે. તેઓ તમારી કુલડીઓ ખરીદી લેશે.