અમદાવાદ સિવિલના ડૉક્ટર્સના દેખાવ

નવગુજરાત સમય > અમદાવાદ

સુરતની સ્મીમેર હોસ્પિટલમાં મંગળવારે દર્દીના સગાએ બે ડૉક્ટર સહિત કુલ ચાર પર હુમલો કર્યો હતો. હુમલાના કારણે તમામને હોસ્પિટલમાં દાખલ કરવા પડ્યા હતાં. આ બનાવના પગલે અમદાવાદ સહિત વડોદરા શહેરની સરકારી હોસ્પિટલના ડૉક્ટરોએ એક દિવસની પ્રતિકાત્મક હડતાલ કરી હતી. અમદાવાદ સિવિલ કેમ્સપના ડૉક્ટરો બપોરે એક કલાકથી સાંજે આઠ કલાક દરમિયાન હોસ્પિટલ કાર્યથી અળગા રહ્યા હતાં.

આ અંગે અમદાવાદ સિવિલ હોસ્પિટલના રેસિડન્ટ ડૉક્ટર્સ યુનિયનના પ્રેસિડન્ટ ડૉ. વિદુર જોષીએ કહ્યું કે, સુરતમાં દર્દીના સગાએ ડૉક્ટર પર હુમલો કરી તેમને ઈજા પહોંચાડી હતી. ખાસ કરીને સરકારી હોસ્પિટલોમાં દર્દીના સગા તરફથી ડૉક્ટરો પર હુમલો થવાના બનાવ વધી રહ્યા છે, જે ખૂબ જોખમી છે. સરકારી હોસ્પિટલમાં રેસિડન્ટ ડૉક્ટરોની કોઈ સલામતી નથી. જેના વિરોધમાં અમદાવાદ સિવિલના ડૉક્ટરોએ એક દિવસના પ્રતિકાત્મક દેખાવ કર્યા હતાં.

ડૉ. જોષીએ કહ્યુ કે, દેખાવના કારણે ઈમરજન્સીના દર્દીઓને મુશ્કેલી ન પડે તે માટેની પૂરતી કાળજી લેવામાં આવી હતી. ઈમરજન્સી અને ક્રિટિકલ કેર સર્વિસ માટે ડ્યુટી બજાવતા ડૉક્ટરો દેખાવમાં જોડાયા નહોતા. સુરતની સ્મીમેર હોસ્પિટલની ઘટનાની યોગ્ય તપાસ થવી જોઈએ અને હોસ્પિટલ પ્રિમાઈસિસમાં આ પ્રકારની ઘટના બને નહીં તે માટે પૂરતી વ્યવસ્થા થવી જોઈએ તેમ રેસિડન્ટ ડૉક્ટરોએ માંગ કરી હતી. સિવિલના ૫૫૦થી વધુ રેસિડન્ટ ડૉક્ટર દેખાવમાં જોડાયા હતાં.