રિક્ષા, ટ્રક, કેબ અને સ્કૂલ બસ ચલાવે છે આ અમદાવાદી મહિલાઓ!

નવી દિલ્હીઃ જો તમે અમદાવાદમાં ફરી રહ્યા હોવ અને કોઈ કેબ ડ્રાઈવર કે રિક્ષા ડ્રાઈવર તરીકે મહિલા જોવા મળે તો આશ્ચર્ય નહીં પામતા. શહેરમાં એક NGO જનવિકાસ ‘ડ્રાઈવરબેન પ્રોજેક્ટ’ અંતર્ગત સામાજીક રીતે છેવાડાની અથવા જે મહિલાના ખંભે જ પોતાના પરિવારની જવાબદારી છે તેવી મહિલાઓને ડ્રાઇવર તરીકે ટ્રેનિંગ આપે છે તેમજ તેમને નોકરી અથવા રોજગાર માટે નવી તક આપે છે. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: આ નવી પહેલનો ઉદ્દેશ્ય ગરીબ તબક્કાની મહિલાઓને ડ્રાઈવિંગની ટ્રેનિંગ સાથે સાથે આત્મવિશ્વાસ અને આત્મરક્ષા પાઠ ભણાવી એક ઉજ્જવળ ભવિષ્ય માટે તેમને તૈયાર કરવામાં આવે છે. વર્ષ 2106માં શરુ થયેલા આ પ્રોજેક્ટ દ્વારા અત્યાર સુધીમાં 130 જેટલી મહિલાઓને ટ્રેનિંગ આપવામાં આવી છે જે પૈકી 50 જેટલી મહિલાઓ તો હાલ પ્રોફેશનલ ડ્રાઈવર તરીકે જુદી જુદી જગ્યાએ કામ કરે છે. ડ્રાઈવરની ટ્રેનિંગ સાથે સાથે આ મહિલાઓને સરાકરી યોજનાઓ, પર્સનાલિટી ડેવલોપમેન્ટ, કોમ્યુનિકેશન સ્કિલ, આત્મવિશ્વાસ, મહિલાઓના હક્ક અંગે પણ જાગૃત કરવામાં આવે છે. અહીં આવતી મહિલાઓ શહેરના છેવાડાના અને ગરીબ પરિવારમાંથી આવે છે. જેથી આ પ્રોજેક્ટ ચાલવાતી સંસ્થા માટે સૌથી અઘરી વાત તેમના પરિવાર અને તેમને સમજાવવાની રહે છે. આ પ્રોજેક્ટ હેઠળ ટ્રેનિંગ મેળવીને તૈયાર થનાર મહિલાઓ આજે પોતાના પતિ પર આધારીત ન રહેતા સ્વબળે રોજગાર મેળવે છે. મહિલા રોજગાર મેળવતા તેમના પોતાના વ્યક્તિગત વિકાસની સાથે સાથે પરિવારનો પણ વિકાસ થાય છે. આ મહિલાઓ પોતાનું અને પોતાના સંતાનનું ઉજ્જવળ ભવિષ્ય બનાવી શકે છે. આ પ્રોજેક્ટ સાથે જોડાયેલ દરેક મહિલા એક ઉદાહરણ છે કે સ્ત્રી લાચાર નથી પણ સશક્ત છે. તે કોઈપણ સંઘર્ષ સામે લડીને પુરુષની સમોવડી બની શકે છે, બસ જરુર છે તેની ઈચ્છા શક્તિની.