જમાલપુર માર્કેટ બહાર શાકવાળાઓ પાસેથી રુપિયા પડાવતા ત્રણ પોલીસવાળા ઝડપાયા

અમદાવાદ: એન્ટી કરપ્શન બ્યૂરોએ જમાલપુર શાકમાર્કેટની બહાર ધંધો કરતા લોકો પાસેથી રુપિયા પડાવતા ગાયકવાડ હવેલીના બે કોન્સ્ટેબલ અને એક હેડ કોન્સ્ટેબલને રંગેહાથ ઝડપી લીધા છે. એસીબીના જણાવ્યા અનુસાર, આ ત્રણેય પોલીસકર્મીઓ શાકભાજીનો છૂટક ધંધો કરતા વેપારીઓ પાસેથી અવારનવાર રુપિયા લેતા હોવાનું ધ્યાને આવતા આ ટ્રેપ ગોઠવવામાં આવી હતી.

આજે વહેલી સવારે ત્રણ વાગ્યે એસીબીની ટીમ ત્રણેય લાંચીયા પોલીસકર્મીઓને પકડવા માટે ગોઠવાઈ ગઈ હતી. જગન્નાથ મંદિરના ગેટ નંબર 4ની આગળ દુકાન નંબર 48ની પાછળના ભાગે શાકમાર્કેટની બહાર રાત્રે ત્રણ વાગ્યે ટામેટા ભરીને એક વેપારી તેનું વેચાણ કરવા આવ્યા હતા.

ટામેટાંનું આ વ્યક્તિને ધંધો કરવા દેવા માટે પોલીસવાળા રોજના 50-100 રુપિયા પડાવતા હતા. આજે સવારે પણ ગાયકવાડ હવેલી પોલીસ સ્ટેશનની પીસીઆર વાન નંબર 40ના કર્મચારીઓ ઘટનાસ્થળે આવ્યા હતા, અને ટામેટા ભરેલું છોટા હાથી ઉભું રાખી ટામેટા વેચવા દેવા માટે 100 રુપિયા માગ્યા હતા. આ રકમ તેમણે સ્વીકારતા જ એસીબીની ટીમ ત્રાટકી હતી, અને ત્રણેય લાંચીયા પોલીસકર્મીઓને ઝડપી લીધા હતા. આ સમગ્ર કામગીરી એસીબી પોલીસ સ્ટેશનના પીઆઈ કે.પી. તરેટિયા દ્વારા મદદનીશ નિયામક કે.બી. ચુડાસમાના સુપરવિઝન હેઠળ કરવામાં આવી હતી.

એસીબીના જણાવ્યા અનુસાર, ગાયકવાડ પોલીસ સ્ટેશનના 1) કોન્સ્ટેબલ પ્રભુદાસ ડામોર (ઉં. 51 વર્ષ) રહે. રાણીપ પોલીસ લાઈન, 2) હે. કોન્સ્ટેબલ ક્રિશ્ના બારોટ (ઉં. 48 વર્ષ), રહે. હાઉસિંગ બોર્ડ, બાપુનગર અને 3) દિલિપ બારોટ (ઉં. 48 વર્ષ), રહે. સૈજપુર, નરોડા રોડનો સમાવેશ થાય છે. ત્રણેય પોલીસકર્મીને એસીબીએ પોતાની કસ્ટડીમાં લીધા છે.