ટ્રાફિક સમસ્યાને નાથવા માટે S.G. હાઇવે પર AMCએ 12 દુકાનો કરી સીલ

I am Gujarat

S.G. હાઇવે પર ટ્રાફિક જામ કરતા ટી-સ્ટોલ અને ફૂડ પાર્લર સીલ

અમદાવાદઃ અમદાવાદના પશ્ચિમ ઝોનમાં કર્ણાવતી ક્લબ સામે ટી-સ્ટોલ અને ફૂડ પાર્લરની બહાર થતા આડેધડ પાર્કિંગથી S.G. હાઇવે પર ટ્રાફિક જામની સમસ્યા ગંભીર રીતે વકરી છે. જેના સંદર્ભમાં પ્રખ્યાત ટી સ્ટોલ ખેતલાઆપાને સીલ માર્યા બાદ આજે ઇસ્કોન ગાંઠીયા સહિત 6 દુકાનોમાં કોર્પોરેશનની TDO શાખા દ્વારા સીલ મારવામાં આવ્યા છે. આ ઉપરાંત ગુરૂકુળ રોડ પર પણ ત્રણ દુકાનોને સીલ કરી દેવામાં આવી છે.

ખેતલા આપા ટી સ્ટોલને પહેલા જ કરાયો છે સીલ

આ અંગે નવા પશ્ચિમ ઝોનના એક અધિકારીએ જણાવ્યું કે ‘આ વેપારીઓને તેમની દુકાન પાસે આડેધડ થતા પાર્કિંગ અંગે કેટલીયવાર નોટિસ ફટકારવામાં આવી હતી. તેમ સીલ મારવાની પ્રક્રિયા પણ કરાઈ હતી. જોકે વેપારીઓ દ્વારા લેખિતમાં આડેધડ પાર્કિંગ નહીં થવા દેવાની બાચેંધરી આપતા સીલ ખોલી દેવાયા હતા પરંતુ ફરી એકવાર સ્થિતિ જેમની તેમ આવી જતા સીલ મારી દેવાયા છે.’

આડેધડ પાર્કિંગથી ટ્રાફિકની સમસ્યા

અમદાવાદના S.G. રોડ પર ઇસ્કોન ગાંઠિયા, ઇસ્કોન ભજીયા અને ગોડાઉન, અર્બુદા ટાયર, વિનાયક પરોઠા હાઉસ, સાંઈપાન પાર્લર, કર્ણાવતી સ્નેક્સ, દેવનારાયણ પસ્તી ભંડાર અને એક દિવસ પહેલા ખેતલા આપા ટી સ્ટોલને સીલ મારી દેવાયા છે. જ્યારે ગુરૂકુળ રોડ પર કિચન ફર્મ, ગીફ્ટ શ્રી અને એ-વન સાઇકલને સીલ કરાયા છે.

જોકે કોર્પોરેશનની ઓફિસ પાસે જ આડેધડ પાર્કિંગથી ધમધમતા ગેરેજ

પ્રતિકાત્મક તસવીર જોકે કોર્પોરેશનની આ કામગીરી સામે પણ શંકાની સોઈ ઉભી થઈ છે કેમ કે ખુદ પશ્ચિમ ઝોનની ઓફિસને અડીને આવેલી ઓટોમોબાઇલ્સની દુકાનો આગળ આડેધડ પાર્કિંગ કરેલી કાર્સથી ટ્રાફિક જામની સ્થિતિ હોય છે. તો નજીકમાં જ પ્રેમચંદનગર અને તેની આસપાસની રોહાઉસ સોસાયટીમાં બે રોકટોક કોમર્શિયલ પ્રવૃત્તિ સામે આંક આડા કાન કરવામાં આવે છે.

મધ્ય અમદાવાદમાં પણ દબાણ હટાવો ઝુંબેશ

શહેરના મધ્ય ઝોનની ટીડીઓ શાખાએ પણ આજે શાહપુર બહાઈ સેન્ટરથી લઈને મીરજાપુર હોઝ અને મીરજાપુર મટન માર્કેટથી લઈને ત્રણ ખુણિયા બગીચા માર્કેટ સુધીના ટ્રાફિકને નડતા દબાણો દૂર કર્યા હતા.