ગુજરાતઃ 24 કલાકમાં કોરોનાના 346 કેસ નોંધાયા, રિકવરી રેટ 96.89%

અમદાવાદઃ કોરોના મહામારીના પ્રકોપમાં ગત 24 કલાકમાં ભારતમાં 11,666 નવા કેસ નોંધાયા છે તો 123 મોત પણ થયા છે. દુનિયાભરમાં કોરોનાના કુલ કેસ 10 કરોડ પાર થયા છે તો ભારતમાં પણ વેક્સિનેશનની શરુઆત થઈ ચૂકી છે. અત્યાર સુધી દેશમાં 20 લાખ લોકોને કોરોનાની રસી આપવામાં આવી છે. ગુજરાતમાં પણ 24 કલાકમાં નવા 346 કેસ સામે આવ્યા છે.

96.89% થયો રિકવરી રેટ
રાજ્યમાં 24 કલાકમાં કોરોનાના કુલ 346 કેસ નોંધાયા છે તો તેની સામે રાજ્યમાં 24 કલાકમાં 602 દર્દીઓ સ્વસ્થ થયા છે. જેથી હવે કોરોના મહામારીમાં રાજ્યમાં કુલ 2,52,464 દર્દીઓ કોરોનાને હરાવવામાં સફળ રહ્યાં છે. જેથી રાજ્યનો રિકવરી રેટ પણ 96.89%એ પહોંચ્યો છે.

રાજ્યમાં કુલ 3718 એક્ટિવ કેસ
રાજ્યમાં નવા કેસમાંથી અમદાવાદમાં 78, સુરતમાં 50, વડોદરામાં 81 તેમજ રાજકોટમાં 49 દર્દીઓનો સમાવેશ થાય છે. જ્યારે રાજ્યમાં કુલ 3718 એક્ટિવ કેસમાંથી 41 દર્દીઓને વેન્ટિલેટર સપોર્ટ પર રાખવામાં આવ્યાં છે. જ્યારે 3677 સ્ટેબલ છે. રાજ્યમાં 24 કલાકમાં અમદાવાદમાં 1 અને મહિસાગરમાં 1 મોત નોંધાતા હવે રાજ્યમાં કુલ મૃત્યુઆંક પણ 4384એ પહોંચ્યો છે.

24 કલાકમાં 59,893 વ્યક્તિઓને અપાઈ કોરોના વેક્સીન
દેશમાં આશરે 20 લાખ લોકોને કોરોનાની વેક્સીન આપવામાં આવી છે તો રસી લગાડવાના મામલે કર્ણાટક સૌથી આગળ છે. ગુજરાતમાં પણ 24 કલાકમાં 1268 કેન્દ્રો પર 59,893 વ્યક્તિઓને કોરોનાની રસી આપવામાં આવી છે. જેથી અત્યાર સુધીમાં કુલ 1,55,802 વ્યક્તિઓનું રસીકરણ થયું છે.