ગુજરાતઃ 24 કલાકમાં કોરોનાના 353 કેસ નોંધાયા, રિકવરી રેટ પણ 96.79%

અમદાવાદઃ દેશમાં મંગળવારે નવ મહિના પછી દસ હજારથી ઓછા કેસ સામે આવ્યા છે. એકબાજુ ભારત બાયોટેકે એવો દાવો કર્યો છે કે તેની વેક્સિન UKના કોરોના સ્ટ્રેન પર પણ અસર કરી શકે છે તો વેક્સીન સપ્લાય પર ભારતે શ્રીલંકાને 28 જાન્યુઆરીના રોજ પાંચ લાખ ડોઝ પહોંચાડવાનો પણ વાયદો કર્યો છે. દેશમાં કોરોનાની ઝડપ ધીમી પડી છે તો મંગળવારે કુલ 117 લોકો મોતને ભેટ્યા હતાં. આ સંખ્યા પણ સાડા નવ મહિનામાં સૌથી ઓછી છે. ગુજરાતમાં પણ 24 કલાકમાં કોરોનાના 353 કેસ નોંધાયા છે.

96.79% થયો રિકવરી રેટ
રાજ્યમાં 24 કલાકમાં કોરોનાના કુલ 353 કેસ નોંધાયા છે તો તેની સામે રાજ્યમાં 24 કલાકમાં 462 દર્દીઓ સ્વસ્થ થયા છે. જેથી હવે કોરોના મહામારીમાં રાજ્યમાં કુલ 2,51,862 દર્દીઓ કોરોનાને હરાવવામાં સફળ રહ્યાં છે. જેથી રાજ્યનો રિકવરી રેટ પણ 96.79%એ પહોંચ્યો છે.

રાજ્યમાં કુલ 3976 એક્ટિવ કેસ
રાજ્યમાં નવા કેસમાંથી અમદાવાદમાં 75, સુરતમાં 47, વડોદરામાં 75 તેમજ રાજકોટમાં 64 દર્દીઓનો સમાવેશ થાય છે. જ્યારે રાજ્યમાં કુલ 3976 એક્ટિવ કેસમાંથી 43 દર્દીઓને વેન્ટિલેટર સપોર્ટ પર રાખવામાં આવ્યાં છે. જ્યારે 3933 સ્ટેબલ છે. રાજ્યમાં 24 કલાકમાં અમદાવાદ કોર્પોરેશનમાં વધુ 1 મોત નોંધાતા હવે રાજ્યમાં કુલ મૃત્યુઆંક પણ 4382એ પહોંચ્યો છે.


24 કલાકમાં 3787 વ્યક્તિઓને અપાઈ કોરોના વેક્સીન
દેશમાં આશરે 20 લાખ લોકોને કોરોનાની વેક્સીન આપવામાં આવી છે તો રસી લગાડવાના મામલે કર્ણાટક સૌથી આગળ છે. ગુજરાતમાં પણ 24 કલાકમાં 33 કેન્દ્રો પર 3787 વ્યક્તિઓને કોરોનાની રસી આપવામાં આવી છે. જેથી અત્યાર સુધીમાં કુલ 95,909 વ્યક્તિઓનું રસીકરણ થયું છે.