ટ્રાફિક પોલીસનો સપાટો, એક જ દિવસમાં 100થી વધુ કોલેજ સ્ટૂડન્ટ્સના મેમો ફાટ્યા

અમદાવાદ: શહેરની ટ્રાફિક પોલીસે છેલ્લા કેટલાક દિવસોથી નિયમોનો ભંગ કરનારાઓ પર સખ્તી બોલાવી છે. આજે લૉ ગાર્ડન વિસ્તારમાં આવેલી એક કોલેજ પાસે પોલીસ દ્વારા કાર્યવાહી કરાઈ હતી, જેમાં કોલેજમાં હેલ્મેટ પહેર્યા વિના આવતા 100 જેટલા સ્ટૂડન્ટ્સના મેમો ફાડવામાં આવ્યા હતા. પોલીસે પાંચ ગાડીઓને પણ ડિટેઈન કરી છે. હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો સ્કૂલ-કોલેજોમાં ઘણા વિદ્યાર્થીઓ ટુ-વ્હીલર લઈને આવતા હોય છે. જોકે, ઘણા સ્ટૂડન્ટ્સ હેલ્મેટ પહેરવાનું ટાળતાં હોય છે, અને કેટલાકની પાસે તો ડ્રાઈવિંગ લાઈસન્સ પણ નથી હોતા. આવા સ્ટૂડન્ટ્સ સામે આજે ટ્રાફિક પોલીસે સખ્તી અપનાવતા તેમને દંડ ફટકાર્યો હતો. એટલું જ નહીં, કોલેજના ગેટ પર પણ ‘નો હેલ્મેટ, નો એન્ટ્રી’નું બેનર પણ લગાવાયું છે. અમદાવાદમાં થોડા દિવસ પૂરપાટ દોડતી એક સ્કૂલવાનમાંથી ત્રણ બાળકો પડી ગયાની ઘટના સામે આવતા પોલીસે સ્કૂલ રિક્ષા અને વાન વિરુદ્ધ પણ અભિયાન શરુ કર્યું છે, અને ટ્રાફિકના નિયમોનો ભંગ કરનારા રિક્ષા કે વાનચાલકોને પણ દંડ ફટકારવામાં આવી રહ્યો છે, આ કાર્યવાહી પોલીસે આજે પણ ચાલુ રાખી હતી. જે લોકોને જુના ઈ-મેમો ભરવાના બાકી છે તેવા લોકો પર પણ પોલીસે ઘોંસ બોલાવી છે. હવે પોલીસને એવા ડિવાઈસ આપવામાં આવ્યા છે કે જેનાથી ટ્રાફિકના નિયમનો ભંગ કરતા પકડાયેલા કોઈપણ વાહનચાલકને કોઈ જૂનો ઈ-મેમો ભરવાનો બાકી છે કે કેમ તે જાણી શકાય છે, અને પોલીસ સ્થળ પર જ આવા લોકો પાસેથી જૂનો દંડ પણ વસૂલી રહી છે.