અમદાવાદમાં ભારે વરસાદ, વીજળી પડતાં બેનાં મોત

અમદાવાદ: આજ સવારથી જ વરસી રહેલા ધમધોકાર વરસાદે અમદાવાદને ધમરોળ્યું છે. ભારે વરસાદના કારણે શહેરના અનેક વિસ્તારોમાં પણ પાણી ભરાઈ જવાથી જનજીવન ભારે પ્રભાવિત થયું છે. સવારથી જ શરુ થયેલા વરસાદને કારણે લોકોને ઓફિસે જવામાં તકલીફ પડી હતી, જ્યારે સ્કૂલ અને કોલેજોમાં પણ પાંખી હાજરી જોવા મળી હતી. બીજી તરફ, શહેરના છેવાડે આવેલા શીલજ વિસ્તારમાં વીજળી પડવાની ઘટના બની છે જેમાં બે લોકોએ જીવ ગુમાવ્યા છે. જેમાં એક મહિલાનો સમાવેશ થાય છે. કુલ ચાર લોકો પર વીજળી પડી હતી જેમાં 2 વ્યક્તિ ઘાયલ થઈ છે જેમાંથી એક વ્યક્તિની હાલ ગંભીર છે. વાસણા વિસ્તારમાં ભૂવો પડ્યો સવારે છ વાગ્યાથી નવ વાગ્યા દરમિયાન અમદાવાદ શહેરમાં સરેરાશ 18.25 મીમી વરસાદ પડ્યો છે. જ્યારે, વેજલપુર, બોડકદેવ, ગોતામાં ત્રણ કલાકમાં 22.57 મીમી વરસાદ પડ્યો હતો. શહેરના નીચાણવાળા ચકુડિયા મહાદેવ, ઓઢવ, વિજયનગર વિસ્તારમાં સૌથી વધુ 33.50 મીમી વરસાદ પડ્યો હતો, જેના કારણે અહીં ઠેરઠેર પાણી ભરાઈ ગયા હતા. હવામાન ખાતાના જણાવ્યા અનુસાર, રાજ્ય પર સક્રિય થયેલી સિસ્ટમને કારણે અમદાવાદ તેમજ દક્ષિણ ગુજરાતમાં ભારે વરસાદ થઈ શકે છે. શહેરમાં આગામી 24 જુલાઈ સુધી વરસાદી વાતાવરણ રહેવાની શક્યતા હોવાનું હવામાન ખાતાએ જણાવ્યું છે. સવારે વરસાદના સમયે ચાર જણા પર વીજળી પડી હતી જેમાં 2 લોકોના ઘટના સ્થળ પર જ મોત થઈ ગયા હતા જ્યારે બે વ્યક્તિઓને સ્થાનિક ખાનગી હોસ્પિટલમાં સારવાર માટે ખસેડવામાં આવ્યા છે. બે લોકોના મોત થયા છે જેમાં એક મહિલા હતા તેમનું નામ કોકીલા બેન ઠાકોર છે. વરસાદને કારણે શહેરના વાસણા વિસ્તારમાં ભૂવો પડ્યો હતો. ઉલ્લેખનીય છે કે, દર વખતે મ્યુનિસિપલ કોર્પોરેશન પ્રિ-મોન્સૂન પ્લાનમાં કરોડો રુપિયાનો ખર્ચો કરે છે, પરંતુ દર વખતની જેમ આ વખતે પણ વરસાદે થોડું જોર બતાવતા જ આખુંય શહેર જળબંબાકાર થઈ ગયું હતું. કેટલાક વિસ્તારોમાં તો ગોઠણસમા પાણી ભરાઈ જતાં ટ્રાફિક પ્રભાવિત થયો હતો, અને ટૂ વ્હીલર લઈને ઓફિસે જવા નીકળેલા લોકોના વાહનો પાણીને કારણે બંધ થઈ જતાં લોકોને ભારે પરેશાની ભોગવવી પડી હતી.