ગાંધીનગર: માસ્ક મામલે રાજ્ય સરકારની નાગરિકોને મહત્વની અપીલ

ગાંધીનગર: ગુજરાત સહિત વિશ્વભરમાં કોરોના વાયરસ હાહાકાર મચાવી રહ્યો છે. સંક્રમણથી બચવા માટે કોઈ વેક્સીન પણ હાલમાં ઉપલબ્ધ નથી. ત્યારે ચેપથી બચવા માટે માસ્ક જ સૌથી સરળ ઉપલબ્ધ વિકલ્પ છે. કોરોના સામે રક્ષણ મેળવવા માટે લોકો વિવિધ પ્રકારના ફિલ્ટર કે વાલ્વવાળા માસ્કનો પણ ઉપયોગ કરતા હોય છે. જો કે, આરોગ્ય વિભાગની યાદીમાં જણાવ્યા અનુસાર આવા માસ્ક કોરોનાગ્રસ્ત વ્યક્તિ પહેરે તો વિષાણુંઓ સામે પૂરતું રક્ષણ આપતાં નથી, તેથી આવાં માસ્ક પહેરવા હિતાવહ નથી જેથી સાદા તેમજ કાપડના માસ્કનો ઉપયોગ કરવો જોઈએ.

આરોગ્ય વિભાગના અધિક નિયામકે મોકલ્યો પત્ર!
મીડિયા રિપોર્ટ મુજબ માસ્ક મામલે રાજ્ય સરકારે તમામ વિભાગોને લેખિત આદેશ કર્યો છે જેમાં ફિલ્ટર કે વાલ્વવાળા માસ્ક ન પહેરવાનું કહેવામાં આવ્યું છે. આ પાછળનું કારણ એવું છે કે આવા માસ્ક કોરોના સામે રક્ષણ નથી આપતા. આરોગ્ય વિભાગના અધિક નિયામકે તમામ જિલ્લા આરોગ્ય અધિકારીઓને એક પત્ર મોકલ્યો છે. લોકો આવા માસ્કનો ઉપયોગ ન કરે તે સુનિશ્ચિત કરે તેવી સૂચના આપવામાં આવી છે.

'વાલ્વવાળા તેમજ N-95 માસ્ક કોરોના સામે રક્ષણ પૂરું પાડતા નથી'
શરૂઆતથી 95 માસ્ક સૌથી સલામત હોવાનું માનવામાં આવતું હતું, પરંતુ એક્સપર્ટોએ કહ્યું છે કે વાલ્વવાળા તેમજ એન 95 માસ્ક કોરોના સામે રક્ષણ પૂરું પાડતાં નથી. બાદમાં કેન્દ્રીય આરોગ્ય અને પરિવાર કલ્યાણ મંત્રાલયે પણ આને લગતી માર્ગદર્શિકા જારી કરી હતી. નિષ્ણાતોએ ઘરે સુતરાઉ કાપડના ટૂ-થ્રી લેયર માસ્ક પણ સલામત જાહેર કર્યા છે. એનો ફરી ઉપયોગ ધોઈને કરી શકાય છે. જોકે, વારંવાર તેનો ઉપયોગ કરી શકાતો નથી.

આરોગ્ય વિભાગની યાદીમાં શું જણાવવામાં આવ્યું?
કોરોના સંક્રમણથી બચવા માટે હાલ કોઈ રસી ઉપલબ્ધ નથી. આ સમયે માસ્ક એ જ સૌથી સરળ ઉપલબ્ધ વિકલ્પ છે. હાલમાં પ્રજાજનો દ્વારા ઉપયોગમાં લેવામાં આવતા વિવિધ પ્રકારના માસ્ક પૈકી ફિલ્ટર કે વાલ્વવાળા માસ્કનો પણ ઉપયોગ કરવામાં આવે છે. આવા માસ્ક કોરોનાનાં વિષાણુંઓ સામે પૂરતું રક્ષણ આપતા નથી. ભારત સરકારના આરોગ્ય અને પરિવાર કલ્યાણ મંત્રાલય દ્વારા પણ આ પ્રકારના માસ્કનો ઉપયોગ ન કરવા માર્ગદર્શિકા આપવામાં આવી છે. આથી આપના વિસ્તારમાં તમામ પ્રજાજનો વાલ્વ કે ફિલ્ટરવાળા માસ્કનો ઉપયોગ ન કરે તે સુનિશ્ચિત કરશો.