અમદાવાદ: 'પતિથી ખુશ નથી માટે હત્યા કરાવવી છે...' કિલરને સોપારી આપી પત્નીએ કરાવ્યું મર્ડર

અમદાવાદ: ગત મંગળવારે સીએન વિદ્યાલયની બહાર એક 55 વર્ષીય ઓટો રિક્ષા ચાલકની હત્યાનો ભેદ આખરે ઉકેલાઈ ગયો છે. પોલીસ તપાસ દરમિયાન પત્નીએ જ ગુંડાઓને સોપારી આપીને પતિને મોતને ઘાટ ઉતરાવી દીધાનું સામે આવતા પોલીસ પણ ચોંકી ઉંઠી હતી. ઉલ્લેખનીય છે કે, મૃતકની ઓળખ શાંતિલાલ ધંધુકિયા તરીકે થઈ હતી. મંગળવારે સવારે ધંધુકિયા સવારે કામ માટે ઘરેથી નીકળ્યા હતા અને બાદમાં સીએન વિદ્યાલય ખાતે પેસેન્જરને મૂકવા ગયા હતા.

મૃતકની પત્ની સહિત 6ની ધરપકડ, એક હજી ફરાર
ત્યારબાદ તેમને અજાણ્યા વ્યક્તિ દ્વારા છરી વડે હત્યા કરવામાં આવી હતી. ત્યારબાદ ધંધુકિયાને સારવાર માટે સિવિલ હોસ્પિટલમાં લઈ જવાયા હતા જ્યાં સારવાર દરમિયાન તેમનું મોત નીપજ્યું હતું. ત્યારબાદ એલિસબ્રિજ પોલીસ સ્ટેશનમાં એફઆઈઆર નોંધવામાં આવી હતી અને આરોપીઓની શોધખોળ હાથ ધરી હતી. જેમાં સીસીટીવીના આધારે પોલીસને કડી મળતી ગઈ અને આરોપીઓ સુધી પહોંચવામાં સફળતા મળી. આ કેસમાં પોલીસે મૃતકની પત્ની સહિત કુલ 6 આરોપીઓની ધરપકડ કરીને કાયદેસરની કાર્યવાહી હાથ ધરી છે. જ્યારે હજી એક આરોપી ફરાર હોવાથી તેની શોધખોળ કરવામાં આવી રહી છે.

કેવી રીતે ઉકેલાયો કેસ?
પ્રાપ્ત અહેવાલો અનુસાર હત્યાકેસમાં શરૂઆતમાં કોઈપણ કડી ન મળતા પોલીસે સીસીટીવીના આધારે તપાસ હાથ ધરી હતી, જેમાં તેમને એક નંબર વગરની રિક્ષા દેખાતા તપાસ કરતા રિક્ષા ઈમ્તિયાઝ ઉર્ફે બાબાની હોવાનું જાણવા મળ્યું હતું. ત્યારબાદ પોલીસે ઇમ્તિયાઝને ઝડપીને પૂછપરછ કરતા તે હત્યામાં સંડોવાયેલો હોવાનું કબૂલ્યું હતું. જોકે હત્યા માટેનું કારણ તેની પાસે નહોતું, પરંતુ આ ગુનામાં તેની સાથે બાબા શાહરુખ અને અલ્તમસ નામના બે યુવકો પણ સામેલ હતા.

4 લાખમાં કર્યો હત્યાનો સોદો
એક પછી એક ધરપકડ બાદ પોલીસે પૂછપરછ કરતા શાહરૂખે કબુલાત કરી કે શકિલ નામના વ્યકિતએ તેમને રૂપિયા આપીને હત્યાની સોપારી આપી હતી. પોલીસે શકિલને પણ ઉઠાવી લાવીને પૂછપરછ કરતા શાંતિલાલની હત્યા માટેની સોપારી તેને શાહઆલમમાં દુકાન ધરાવતા ફૈઝુદ્દીને આપી હતી. પોલીસે ફૈઝુદ્દીનની પૂછપરછ કરતા પોતાના મિત્ર સાબિર અંસારી સાથે મળીને શાતિલાલની હત્યાનું કાવતરૂ ઘડ્યું હોવાનો ખુલાસો થયો હતો. ફૈઝુએ પોલીસ પૂછપરછમાં ધડાકો કર્યો કે, શાંતિલાલની હત્યા માટે તેની પત્ની રૂપલે જ ચાર લાખ રૂપિયાની સોપારી આપી હતી. જેમાં 2 લાખ રૂપિયા એડવાન્સ આપ્યા હતા. જેમાંથી હત્યારાઓને 10,15, અને 20 હજાર મળ્યા હતા.

પત્નીએ જણાવ્યું હત્યા કરાવવા પાછળનું કારણ
મૃતકની પત્ની રૂપલ ઘરે એમ્બ્રોઈડરીનું કામ કરતી હોવાથી તે કામ લેવા ફૈઝુની દુકાને આવતી હતી. ઓળખાણ થતાં રૂપલે ફૈઝુ અને તેના મિત્ર સાબિરને કહ્યું કે પતિ શાંતિલાલથી ખુશ નથી માટે તેની હત્યા કરાવવી છે અને તેના માટે પૈસા આપવા માટે પણ તૈયાર છે. રૂપલે સોપારી આપવાની તૈયારી કરતાં ફૈઝુ અને સાબિરે આ કામ માટે શકીલને સોપારી આપી હતી અને શકીલે આ કામ શાહરૂખ, ઇમ્તિયાઝ અને અલ્તમસને સોપ્યું હતું.

હત્યાને પગલે પોલીસે તાત્કાલિક તપાસનો ધમધમાટ શરૂ કર્યો હતો અને હત્યાના દિવસના શાંતિલાલના ઘરથી લઇને હત્યાના સ્થળ સુધીના ફુટેજ ચેક કર્યા હતા. જેમાં દરેક ફુટેજમાં શાંતિલાલની રિક્ષા પાછળ એક નંબર વગરની રિક્ષા નજરે પડી. વધુ તપાસ કરતા રિક્ષાચાલકનો ચહેરો પણ દેખાઈ ગયો અને આખરે હત્યાનો ભેદ ઉકેલાયો હતો. પોલીસ તપાસમાં એવું પણ જાણવા મળ્યું છે કે, પતિ ઘરેથી નિકળે ત્યારે રૂપલ જ તેનું લોકેશન ફૈઝુને શેર કરતી હતી. એટલું જ નહીં, શાંતિલાલની હત્યા માટે હત્યારાઓ બે મહિનાથી તેમની રેકી કરતા હતા અને આ દરમિયાન તેમણે 10 વખત હુમલાના પ્રયાસ પણ કર્યા હતા અને આખરે મંગળવારે હત્યાને અંજામ આપ્યો હતો.