પરસ્ત્રીઓ સાથે આડા સંબંધ રાખતા પતિએ ગુપ્ત રોગનો ચેપ લગાવ્યાનો પત્નીનો આક્ષેપ

અમદાવાદઃ વેજલપુર પોલીસ સ્ટેશનમાં વિચિત્ર ફરિયાદ નોંધાઈ છે, જેમાં એક મહિલાએ પોતાના પતિ પર પોતાને ગુપ્ત રોગનો ચેપ લગાડવાનો આક્ષેપ કર્યો છે. આ સિવાય મહિલાએ પતિ તથા સાસુ-સસરા પર દહેજની માગણી કરવામાં આવતી હોવાનું પણ ફરિયાદમાં જણાવ્યું છે. વેજલપુર પોલીસે આ ઘટનામાં આરોપીઓ વિરુદ્ધ ગુનો નોંધીને તપાસ હાથ ધરી છે.

વેજલુપરમાં રહેતી 36 વર્ષની મહિલાના લગ્ન વર્ષ 2017માં થયા હતા. લગ્ન પછી શરુઆતમાં બધું સારું ચાલ્યા પછી ઘરમાં ખોટા ઝઘડાઓ ઉભા થવા લાગ્યા જેમાં નાની-નાની બાબતો મોટું સ્વરુપ ધારણ કરી લેતી હતી.

મહિલાનો વ્યસની પતિ સવારે 10 વાગ્યે ઘરેથી નીકળી ગયા બાદ રાત્રે 10 વાગ્યે પરત આવતો હતો આ અંગે મહિલા કશું પૂછે તો તેને માર મારવામાં આવતો હતો. મહિલાએ પોતાની રીતે તપાસ કરી તો જાણવા મળ્યું કે તેના પતિના અન્ય મહિલાઓ સબંધ હતા પરંતુ પોતાનું ઘર ના તૂટે એ માટે મહિલાએ બધું મૂંગા મોઢે સહન કરી લીધું હતું. પરંતુ ત્રાસ વધવાના કારણે તે 2019માં પિયર ચાલી ગઈ હતી ને વકીલ દ્વારા નોટિસ મોકલી હતી, પરંતુ સમાધાન થતાં તે પરત પોતાના સાસરે જતી રહી હતી.

સાસુ-સસરા સાથે સમાધાન પછી ફરી ઘરે ગયેલી મહિલાને સાસરિયાઓનું વર્તન જરાય સુધરેલું ના લાગ્યું, પતિની ઓફિસ કરવા પિયરમાંથી 50 લાખ રુપિયા લઈ આવવાનું પણ દબાણ કરવામાં આવ્યું હતું. લોકડાઉન દરમિયાન પત્નીને પતિના કબાટમાંથી વિવિધ દવાઓ, ક્રીમ અને પાઉડર મળી આવ્યા હતા, પરંતુ પતિએ આ અંગે કોઈ જવાબ આપ્યો નહોતો. મહિલાના શરીર પર લાલ રંગના ડાઘા ઉપસી આવતા તેણે આ અંગે પતિને વાત કરી તો પતિએ તેને પોતાના કબાટમાં પડેલી દવાઓ લગાવી લેવાની સલાહ આપી હતી. આ પછી મહિલાએ જ્યારે ડૉક્ટરને બતાવ્યું ત્યારે ખબર પડી કે તેને હર્પીસનો ચેપ લાગ્યો છે.

પોતાને લાગુ પડેલા ચેપ અંગે મહિલાએ સાસુ-સસરા સાથે વાત કરી તો તેમની સાથે ઝઘડો થઈ ગયો. મહિલાની મહેન અને માતા સમજાવવા માટે ઘરે પહોંચ્યા તો તેમની સાથે પણ તેમણે ઝઘડો કર્યો અને મહિલાને પહેરેલા કપડે જ ઘરમાંથી બહાર કાઢી મૂકી હોવાની ફરિયાદ મહિલાએ વેજલપુર પોલીસ સ્ટેશનમાં નોંધાવી છે. હવે મહિલાએ લગાવેલા આક્ષેપો કેટલા સાચા છે તે તમામ બાબતો પોલીસ દ્વારા તપાસ કરવામાં આવશે તેમાં બહાર આવશે.