દીકરીના બર્થડે પર કેક લેવા જતી મહિલા પાછળ પાઈપ લઈને મારવા દોડ્યો પૂર્વ પતિ

અમદાવાદઃ શહેરના પટવા શેરી ખાતે રહેતી મહિલાને તેના ભાઈ સાથે દીકરીના જન્મદિવસે કેક લેવા જઈ રહી હતી, આ દરમિયાન તેના પૂર્વ પતિએ ફેમિલી કોર્ટમાં ચાલી રહેલો કેસ પાછો ખેંચી લેવા માટે પ્રેશર કરીને મહિલાના એક્ટિવાને લોખંડની પાઈપ મારીને હુમલો કર્યો હતો. જે બાદ મહિલાએ પૂર્વ પતિ વિરુદ્ધ કારંજ પોલીસ સ્ટેશનમાં ફરિયાદ નોંધાવી છે.

સ્થાનિક ન્યૂઝ રિપોર્ટ મુજબ, ઘટના મુજબ, શહેરની પટવા શેરીમાં દીકરા અને દીકરી સાથે માતા-પિતાના ઘરમાં રહેતા 28 વર્ષના ઝેબાબાનુ સલીમ અહેમદ મેવાતીએ નોંધાવેલી ફરિયાદ મુજબ, તેના લગ્ન 2008માં જુહાપુરા ખાતે રહેતા જાવેદબેગ યુનુસબેગ મિર્ઝા સાથે થયા હતા. પરંતુ લગ્નજીવન દરમિયાન બંને વચ્ચે મનમેળ ન આવતા વર્ષ 2018માં તેઓ ઈસ્લામ રીતરિવાજો મુજબ તલાક લઈને છૂટા થઈ ગયા. ઝેબાબાનુએ પતિ ઉપર ફેમિલી કોર્ટમાં કેસ કરેલો હતો.

શુક્રવારના રોજ ઝેબાબાનુ પોતાની દીકરીનો જન્મદિવસ હોવાથી તેમના ભાઈ સાથે એક્ટિવા પર કેક લેવા માટે નીકળ્યા હતા. એવામાં પથ્થરકુવા પેટ્રોલપંપ પાસે જાવેદ બેગ તેના મિત્રો સાથે ઊભો હતો. તેણે ઝેબાબાનુને એક્ટિવા પર જોઈને પીછો કર્યો અને રિલીફ ચાર રસ્તા પાસે ચાલુ એક્ટિવાએ કેસ પાછો ખેંચી લેવાની ધમકી આપી હતી અને અપશબ્દો કહ્યા હતા.

આ બાદ તેણે ચાલુ એક્ટિવાને પાઈપ મારવાનો પ્રયાસ કર્યો હતો જેનાથી વાહનને નુકસાન થયું હતું. આટલું જ નહીં જાવેદે તેને જાનથી મારી નાખવાની ધમકી આપતા ઝેબાબાનુએ વાહન હંકારી મૂક્યું હતું. આખરે તેમણે પોતાના પૂર્વ પતિ વિરુદ્ધ ફરિયાદ નોંધાવતા કારંજ પોલીસે જાવેદ બેગ વિરુદ્ધ ગુનો નોંધીને તપાસ હાથ ધરી છે.