સેટેલાઈટમાં રહેતી મહિલાએ પતિ સામે 5 કરોડની છેતરપિંડીની ફરિયાદ નોંધાવી

અમદાવાદ: મીના પટેલ નામના 51 વર્ષીય મહિલાએ સેટેલાઈટ પોલીસમાં તેમના પતિ સંજય પટેલ વિરુદ્ધ છેતરપિંડી અને વિશ્વાસભંગની ફરિયાદ નોંધાવી છે. ફરિયાદ અનુસાર, સંજયે કથિત રીતે મીનાના નામના શેર વેચ્યા હતા અને બાદમાં પોતાના વ્યક્તિગત ખાતામાં 5 કરોડ રૂપિયા ટ્રાન્સફર કર્યા હતા.

પતિ અને પત્નીનું એક જ બેંકમાં જોઈન્ટ એકાઉન્ટ હતું
શિવરંજની ક્રોસ રોડ ખાતે રહેતી મહિલાએ જણાવ્યું છે કે તે SRN કોર્પોરેશનમાં ભાગીદાર હતી અને તેથી તેણીનું પતિ સંજય સાથે આશ્રમ રોડ પરની બેંકમાં જોઈન્ટ એકાઉન્ટ હતું. તેણીએ જણાવ્યું કે તેણીનું ડીમેટ ખાતું પણ તે જ બેંકમાં છે અને તેના ખાતામાં ઘણા શેર લિસ્ટેડ છે.

શેર વેચી 4.91 કરોડ પોતાના ખાતામાં ટ્રાન્સફર કરાવ્યા
ફરિયાદીએ વધુમાં જણાવ્યું કે, તેમની વચ્ચે કેટલીક નાણાકીય બાબતોને લઈને ઝઘડો થયો હતો. ફરિયાદીએ જણાવ્યું કે જ્યારે તેમણે ઓક્ટોબર 2021માં ડીમેટ એકાઉન્ટ ચેક કર્યું ત્યારે તેમને ખબર પડી કે એક કંપનીના ઘણા શેર વેચવામાં આવ્યા છે અને જ્યારે તેમણે મુંબઈમાં આવેલી કંપનીમાંથી પૈસા ક્યાં ટ્રાન્સફર કરવામાં આવ્યા તેની પૂછપરછ કરી તો તેમને ખબર પડી કે 4.91 કરોડ રૂપિયા તેમના ખાતામાં ટ્રાન્સફર કરવામાં આવ્યા હતા જે તેમના પતિ સાથે જોઈન્ટ એકાઉન્ટ હતું.

પત્નીએ સેટેલાઈટ પોલીસ મથકમાં ફરિયાદ કરતા તપાસ
મહિલાએ જણાવ્યું કે શહેરની બેંકમાંથી વધુ પૂછપરછ કરતાં બહાર આવ્યું હતું કે તેના પતિએ તેના અંગત ખાતામાં રકમ ટ્રાન્સફર કરી હતી. ત્યારબાદ મહિલાએ તેના પતિ વિરુદ્ધ ફરિયાદ નોંધાવતા સેટેલાઈટ પોલીસે વધુ તપાસ હાથ ધરી છે.