'રાત કો કોલ કરુંગી..' ત્રણ ચોપડી ભણેલા યુવકે CAની સ્ટૂડન્ટને 'કોલગર્લ' દર્શાવી દીધી

અમદાવાદઃ સોશિયલ મીડિયાનો દુરોપયોગના કિસ્સામાં સતત વધારો થઈ રહ્યો છે, ત્યારે કોઈ વ્યક્તિની છબીને ખરાબ કરવા માટે પણ સોશિયલ મીડિયાનો ઉપયોગ કરવામાં આવતો હોય છે. આજ રીતે એક વ્યક્તિએ 19 વર્ષની છોકરીને બદનામ કરવા માટે સોશિયલ મીડિયા પર ફેક અકાઉન્ટ બનાવી દીધા હતા. આ કિસ્સો અમદાવાદ શહેરના પૂર્વ વિસ્તારમાં બન્યો છે.

શહેરના પૂર્વ વિસ્તારથી પશ્ચિમમાં આવતી અને ચાર્ટર્ડ અકાઉન્ટન્ટનું ભણતી 19 વર્ષની યુવતીનું અજાણ્ય વ્યક્તિએ ફેસબૂક અને ઈન્સ્ટાગ્રામ અકાઉન્ટ બનાવીને તેના પર બીભત્સ લખાણ લખીને કૉલગર્લ તરીકે દર્શાવીને યુવતીના તથા તેની માતાના ફોન નંબર જાહેર કરી દીધા હતા. આ કેસમાં જામનગરમાં રહેતા જિતેશની સાઈબર ક્રાઈમે જામનગરથી અટકાયત કરી છે.

પોલીસના ધ્યાને આવ્યું કે સીએનો અભ્યાસ કરતી 19 વર્ષની યુવતીનું સોશિયલ મીડિયા અકાઉન્ટ ના હોવા છતાં તેના નામે ફેસબૂક અને ઈન્સ્ટાગ્રામ પર અકાઉન્ટ બનેલા હતા જેના વિશે તેના ફોઈના દીકરાએ પાછલા વર્ષે 20 સપ્ટેમ્બરના રોજ ફોન કરીને જાણ કરી હતી. આ પછી યુવતીએ ખરેખર શું થયું છે તે જાણવાની કોશિશ કરી, જ્યારે તેણે જોયું કે તેના પોતાના ફોટોનો દુરોપયોગ કરવામાં આવ્યો છે ત્યારે તે ડઘાઈ ગઈ. યુવતીએ પોતાની માતાના ફોનમાં ચેક કર્યું ત્યારે તેને ખ્યાલ આવ્યો કે કે તેના વોટ્સએપ ફોટોનો ખોટો ઉપયોગ કર્યો છે.

જામનગરમાં રહેતા આરોપી જિતેશ રાણાભાઈ ચૌહાણ (પરમાર)ની પોલીસે આ ગુનામાં અટકાયત કરી છે. આરોપીએ યુવતીના ફોટાનો ઉપયોગ કરીને બીભત્સ ભાષાનો પ્રયોગ કર્યો હતો. જિતેશે યુવતીના ફોટો અને મોબાઈલ નંબર તથા તેની માતાનો નંબર અપલોડ કરીને હિન્દીમાં લખ્યું હતું. તેણે લખ્યું હતું કે, "અકેલી હું, કૈસી લગ રહી હું, મુજસે દોસ્તી કરના ચાહોગે, મેરા વોટ્સએપ નંબર, અકેલી હું શેર કરો રાત 11 બજે કોલ કરુંગી.." જેવી ભાષાનો પ્રયોગ કર્યો હતો.

આ બનાવ અંગે યુવતીએ સાઈબર ક્રાઈમમાં ફરિયાદ નોંધાવી હતી. પોલીસે આ અંગે તપાસ કરતા માલુમ પડ્યું હતું કે આરોપી જામનગરનો છે, વિસ્તૃત તપાસ કર્યા બાદ પોલીસે જિતેશને જામનગરના ઉદ્યોગનગમાં આવેલા કાપડિયાવાસની શેરી નંબર-2માંથી ઝડપી પાડ્યો છે. આરોપીએ આવું વિચિત્ર પગલું કેમ ભર્યું તેના વિશે પૂછવામાં આવ્યું તો તેણે જણાવ્યું કે, પોતે ધોરણ-3 સુધી ભણેલો છે અને તે યુવતીને હેરાન કરવા માગતો હતો. જેના માટે તેણે યેનકેન પ્રકારે તેના ફોટો અને નંબર મેળવી લીધા હતા.