હોટલનું ‘ઓનલાઈન’ બુકિંગ કરતી કંપનીના ડેટાની હેરાફેરી!

નવગુજરાત સમય > અમદાવાદ

– ‘ઓનલાઈન’ના જમાનામાં હવે ડેટાની હેરાફેરી થતી હોવાની ઘટનાઓ પ્રકાશમાં આવી રહી છે. હોટલનું ઓનલાઈન બુકિંગ કરતી કંપનીના ડેટાની હેરાફેરી કર્યાની ફરિયાદ અંગે એલીસબ્રિજ પોલીસે એ જ કંપનીના કર્મચારીને પકડી પાડી કાર્યવાહી હાથ ધરી છે. પંચવટી થર્ડ આઈ-૨ બિલ્ડિંગમાં ટ્રાવેલ ડિઝાઈનર ગ્રૂપમાં હોટલોની રૂમનું ઓનલાઈન બુકિંગ કરતી કંપનીમાં કિરણભાઈ પરીખ આસિસ્ટન્ટ જનરલ મેનેજર તરીકે કામ કરે છે. તેમણે કંપનીમાં આસિસ્ટન્ટ કોન્ટ્રાક્ટીંગ મેનેજર તરીકે કામ કરતા ફરીદાબાદના પંકજ સુરેન્દર રહેજા સામે ફરિયાદ નોંધાવી છે. છેતરપિંડી અને આઈ.ટી. એક્ટ હેઠળ નોંધાયેલી ફરિયાદમાં આક્ષેપ કરાયો છે કે, કંપનીનો ડેટા પંકજ રહેજાએ પોતાના અંગત ઈ-મેઈલ આઈ.ડી.થી તેના ભાઈ નીરજ રહેજાના ઈ-મેઈલ ઉપર મોકલી આપ્યો હતો. કંપનીના ઓનલાઈન સપ્લાયરો, લોગીન ડિટેઈલ તથા ઓફલાઈન સપ્લાયોની માહિતી તેમજ હોટલના પ્રોડક્શન રિપોર્ટ તથા કંપનીનો અંગત ડેટા હરીફ કંપનીને ફાયદો થઈ શકે કે કંપનીને નુકસાન પહોંચાડી શકે તે રીતે મોકલી આપવામાં આવ્યો હતો. કંપનીના એક્ટિવ ટ્રેકર સિસ્ટમથી આ ગેરરીતિ પકડાઈ હતી. એલીસબ્રિજના પી.આઈ. બી.એન. રબારીએ છેતરપિંડી અને વિશ્વાસઘાતના આક્ષેપ સાથે કરાયેલી ફરિયાદમાં પંકજ રહેજાને ઝડપી લઈને તપાસ કાર્યવાહી હાથ ધરી છે.