કોંગી MLA પ્રતાપ દૂધાતે PGVCLના અધિકારીને અપશબ્દો કહ્યા, ઓડિયો ક્લિપ વાયરલ

અમરેલી: સાવરકુંડલામાં વીજ મામલે MLA પ્રતાપ દૂધાતે PGVCLના અધિકારી સાથે ગેરવર્તન કર્યું હોવાની ઘટના સામ આવી છે. હાલ PGVCLના અધિકારી અને પ્રતાપ દૂધાતની ફોન પર વાતચીતની કથિત ઓડિયો ક્લિપ પણ સોશિયલ મીડિયામાં વાયરલ થઈ છે. પ્રાપ્ત માહિતી અનુસાર અધિકારીએ રવિવારે ફોન કરવાની ના પાડતા મામલો ઉગ્ર બન્યો હતો.

શું છે મામલો?
મીડિયા રિપોર્ટ અનુસાર છેલણા ગામના કોંગ્રેસના કાર્યકર્તાએ વીજ કંપનીના અધિકારીને વીજ સમસ્યા મામલે ફોન કર્યો હતો. જો કે, અધિકારીએ રવિવારે ફોન કરવાની ના પાડતા મામલો ધારાસભ્ય પ્રતાપ દૂધાત પાસે પહોંચ્યો હતો. જેથી પ્રતાપ દૂધાતે વીજ અધિકારીને ફોન કરીને અપશબ્દો કહ્યા હતા.

કથિત ઓડિયો ક્લિપ વાયરલ
પ્રતાપ દૂધાત: હું પ્રતાપ દૂધાત વાત કરું છું....આપનું શું નામ?
PGVCL અધિકારી: જી. એમ વિસાદ
પ્રતાપ દૂધાત: મારા કાર્યકરે બે દિવસ પહેલા તમને ફોન કર્યો ત્યારે શું જવાબ આપ્યો હતો? રવિવારે
PGVCL અધિકારી: રવિવારે તો ના જ ફોન કરાય ને?
પ્રતાપ દૂધાત: આપણા કોલ સેન્ટર ચાલુ હોય છે?
PGVCL અધિકારી: હા હા ચાલુ હોય છે.
પ્રતાપ દૂધાત: પણ અમારા ખેડૂતો ફોન કરી કરીને થાકી જાય છે છતા ફોન લાગતો નથી. તો કોને ફોન કરવાનો કનુભાઈ દેસાઈ કે મુકેશભાઈને કોને કરીએ?
PGVCL અધિકારી: ફોન ચાલુ જ હોય છે..
પ્રતાપ દૂધાત: તમે સરકારી નોકરી કરો છો....અમારી ઉપર કોઈ ધર્માદો નથી કરતા.
PGVCL અધિકારી: હું નોકરી જ કરું છું કોઈ ધર્માદો નથી કરતો.. બધાને સેવા પૂરી પાડું છું., સભ્યતાથી વાત કરો..
પ્રતાપ દૂધાત: ***** સભ્યતા શેની
PGVCL અધિકારી: તમે ફોન મૂકી દો.

સમગ્ર મામલે MLA પ્રતાપ દૂધાતે ટીવી ચેનલને જણાવ્યું કે, ઓડિયો ક્લિપ અંગે કોઈ સ્પષ્ટતા નથી કરવી, જે બોલ્યો છું એજ જ બોલ્યો છું. કારણ એટલું જ છે કે, બપોરના સમયે PGVCLના અધિકારીઓ ડ્રિંક કરીને બેસે છે અને લોકો સાથે ગમે ત્યારે ગમે તેવું વર્તન કરે છે. મારા સુધી ફરિયાદો આવતા ઘણી વખત રિકવેસ્ટ કરી છે. રવિવારે એક ખેડૂત સાથે ખરાબ વર્તન થતાં મારી પાસે ફરિયાદ આવી એટલે ખેડૂતને કોન્ફરન્સમાં રાખીને અધિકારીને ફોન કર્યો હતો.

ફોન પર અધિકારીને સમજાવવાનો પ્રયાસ કર્યો હતો કે, કંટ્રોલરૂમમાં ફોન બંધ રહે છે અને ત્યારે વાર્તા કરવાની પ્રક્રિયા યોગ્ય ન જણાતા જે કઈ પણ બોલ્યો છું એ લોકો માટે બોલ્યો છું. મારા જાહેર જીવનની અંદર આ પ્રથમ વખત બનાવ બન્યો છે. હું હંમેશા અધિકારીઓને માન આપવામાં માનું છું પણ અધિકારીઓ ખેડૂતો સાથે આવું વર્તન કરશે તો ઈંટનો જવાબ હું પથ્થર આપીશ. એક તરફ તો વીજકાપ કરે છે અને બીજી બાજુ અમારા ખેડૂતોને ધમકાવે છે એ હું નહીં ચલાવી લઉં. ઉલ્લેખનીય છે કે, ગુજરાત વિધાનસભાની ચૂંટણી નજીક આવી રહી છે ત્યારે અમરેલીના સાવરકુંડલાના ધારાસભ્ય પ્રતાપ દૂધાત વિવાદમાં સપડાયા છે.