લુડો ગેમના સટ્ટામાં રૂપિયા 10 લાખનું દેવું થઈ જતા યુવકનો આપઘાત

થરાદ: ઉત્તર ગુજરાતના બનાસકાંઠામાં લુડો ગેમ રમવાના ચક્કરમાં રૂપિયા 10 લાખનું દેવું થઈ જતા એક યુવકે આપઘાત કરી લીધો હોવાની ઘટના બની છે. આ યુવકનો મૃતદેહ બનાસકાંઠાના થરાદ તાલુકાના એક ગામ નજીક નર્મદા કેનાલમાંથી મળી આવ્યો હતો. આ ઘટનાની જાણ થતા પોલીસ અને નગરપાલિકાની ટીમે તરવૈયાની મદદથી આ યુવકનો મૃતદેહ કેનાલમાંથી બહાર કાઢ્યો હતો. મૃતકનું નામ પિયુષ ઠક્કર હોવાનું જાણવા મળ્યું છે અને તેની ઉંમર 23 વર્ષ હતી. પોલીસે આ મૃતદેહને હોસ્પિટલમાં પોસ્ટમોર્ટમ અર્થે ખસેડ્યો હતો.

મળતી માહિતી મુજબ, આ ઘટના પર મૃતકના ભાઈ સંજય ઠક્કરે આક્ષેપ કરતાં જણાવ્યુ હતું કે, મારો ભાઈ શાકભાજી વેચીને પરિવારને મદદ કરતો હતો. છેલ્લાં થોડા સમયથી લુડો ગેમના સટ્ટામાં તેનું રૂપિયા 10 લાખનું દેવું થઈ ગયું હતું. આ દેવાની કુલ રકમના 4 લાખ તો તેણે ચૂકવી દીધા હતા. બાકીના પૈસા માટે કેટલાંક લોકો મારા ભાઈ પાસે કડક ઉઘરાણી કરતા હતા.

મૃતકના ભાઈ સંજય ઠક્કરે વધુમાં જણાવ્યું હતું કે આ લોકોના ત્રાસથી કંટાળીને તેણે કેનાલમાં પડીને આપઘાત કર્યો છે. અથવા તો પછી તેની હત્યા કરીને લાશને કેનાલમાં ફેંકી દેવામાં આવી છે. જ્યાં સુધી આ શખસો સામે ગુનો નહી નોંધાય ત્યાં સુધી અમે મૃતદેહનો સ્વીકાર નહીં કરીએ. અને મૃતક યુવકની પાસેથી કોઈ સુસાઈડ નોટ નથી મળી તેવું પણ સંજયભાઇ ઠક્કરે જણાવ્યું હતું.

પૈસાની કડક ઉઘરાણીના ત્રાસથી યુવકે આપઘાત કર્યો હોય કે પછી તેની હત્યા કરાઈ હોવાના આક્ષેપ સાથે જ્યાં સુધી તે શખસો સામે ગુનો નહીં નોંધાય ત્યાં સુધી યુવકનો મૃતદેહ સ્વીકારવાની પરિવારજનોએ ના પાડી રહ્યા હોવાનું જાણવા મળે છે.