લૂંટેરી દુલ્હન! મહેસાણામાં લગ્ન પછી પત્ની રોકડ અને દાગીના લઈને ફરાર થઈ ગઈ

મહેસાણા: મહેસાણામાં લગ્નના ગણતરીના દિવસોમાં જ પત્ની (Mehsana Looteri Dulhan) લાખો રૂપિયા અને દાગીના લઈને ભાગી ગઈ હોવાનો સાસરિયા દ્વારા આક્ષેપ કરવામાં આવ્યો છે. મીડિયા રિપોર્ટ અનુસાર ઘટનાને 4 મહિના જેટલો સમય વીતિ ગયો છે. જે તે સમયે પરિવારે પોલીસ (Mehsana Police)માં અરજી પણ કરી હતી. જો કે, હજી સુધી કોઈ ફરિયાદ ન થતાં પરિવારે પોલીસને કાર્યવાહી કરીને ન્યાય અપાવાની માંગ કરી હોવાનું જાણવા મળ્યું છે.

મીડિયા રિપોર્ટ અનુસાર મહેસાણા (Mehsana)ના નાગલપુર વિસ્તારમાં સન સિટી રો હાઉસમાં રહેતા મહિલાના પતિ 7 વર્ષથી લકવાગ્રસ્ત છે. જેમને બે પુત્ર છે. જેમાંથી એકનું સમાજમાં સગપણ થતું નહોતું. તેથી તેઓ મહેસાણાના ગોકળ ગઢના દેવ ચૌધરી અને ઈશ્વરભાઈને દીકરાના સગપણ માટે મળ્યા હતા. આ દરમિયાન તેમણે બે લાખ રૂપિયા આપીને યુવકની ભરૂચ (Bharuch)ની યુવતી સાથે લગ્ન કરાવાની વાત કરી હતી.

દીકરાની લાંબા સમયથી લગ્ન કરાવા માટે દોડધામ કરતા પરિવારે આખરે રૂપિયા આપીને વહુ લાવવાનો નિર્ણય કર્યો અને 1.70 લાખ રૂપિયામાં સોદો નક્કી થતા આ બંને સાથે માતા અને દીકરો ભરૂચના કાછિયા (માંડવા) ગામે ગયા હતા. જ્યાં લગ્ન માટે અનિતા વસાવા નામની યુવતી સાથે મુલાકાત થઈ હતી. યુવક અને યુવતી લગ્ન માટે સહમત થતાં પરિવાર ભરૂચ હોટલમાં રોકાયા હતા. જ્યારે ઈશ્વર ચૌધરીના હાથમાં રૂપિયા 1.15 લાખ આપીને લગ્ન નક્કી થયા હતા જેનો વિડીયો પણ સામે આવ્યો છે.

રૂપિયાની લેવડ-દેવડ થયા બાદ મહેસાણાનો પરિવાર યુવતીને લઈને મહેસાણા આવ્યો હતો. જ્યાં બીજા દિવસે વાત થયા મુજબ દેવજી ચૌધરી અને ઈશ્વર ચૌધરીને રૂપિયા 46000 આપવામાં આવ્યા હતા. લગ્નના અઠવાડિયા પછી યુવતી અનિતાએ માનતા પૂરી કરવાની છે કહીને ઘરે જવાનું કહીને નીકળી હતી અને પાછી આવી જ નહીં. આ અંગે પીડિત યુવકની માતાએ જણાવ્યું કે, યુવતી પરત ન ફરતા દેવજી અને ઈશ્વર ચૌધરીનો સંપર્ક કરવામાં આવ્યો હતો. જો કે, મદદ કરવાની જગ્યાએ બંનેએ દીકરાને મારવાની ધમકી આપી હતી.

પરિવારના જણાવ્યા અનુસાર સમગ્ર મામલે મહેસાણા બી ડિવિઝન પોલીસ સ્ટેશનમાં અરજી આપવામાં આવી હતી. પંરતુ ઘટનાના 4 મહિના દરમિયાન કોઈ કાર્યવાહી ન થતાં પરિવારે ફરી એકવાર પોલીસની મદદ માંગી છે અને ઝડપી કાર્યવાહી કરીને ન્યાય અપાવવાની પણ માંગ કરી છે. ઉલ્લેખનીય છે કે, ગુજરાતમાં છેલ્લા ઘણા સમયથી લૂંટેરી દુલ્હનના કિસ્સાઓ સતત વધી રહ્યા છે તેમ છતાંય લોકો આવી છેતરપિંડીનો શિકાર બને છે. હવે ઉપરોક્તમાં કેસમાં શું કાર્યવાહી થશે તે જોવાનું રહેશે.