પાલનપુર સેશન્સ કોર્ટના ઈન્ચાર્જ મદદનીશ સરકારી વકીલ 1 લાખની લાંચ લેતા ઝડપાયા

પાલનપુર: ઉત્તર ગુજરાતના બનાસકાંઠા જિલ્લાના પાલનપુરની સેશન્સ કોર્ટના ઈન્ચાર્જ મદદનીશ સરકારી વકીલને રૂપિયા 1 લાખની લાંચ લેતા એન્ટી કરપ્શન બ્યુરો (ACB)એ ઝડપી લીધા હતા. કોર્ટ કેસમાં આરોપીને મદદ કરવાના બદલામાં તેમણે આ લાંચ માગી હતી. જોકે, ફરિયાદીએ આ અંગે એસીબીને જાણ કરી દીધી હતી. જેને પગલે એસીબીએ છટકું ગોઠવી આ મદદનીશ વકીલને લાંચ લેતા ઝડપી પાડ્યા હતા.

બનાવની વિગત મજબ, સરકારી વકીલ સામે લાંચની ફરિયાદ કરનારા પુત્ર સામે પુત્રવધૂએ શારીરિક અને માનસિક ત્રાસની ફરિયાદ પાલનપુરના પશ્ચિમ પોલીસ મથકમાં કરી હતી. આ કેસ પાલનપુર સેકન્ડ એડિશનલ ચીફ મેજિસ્ટ્રેટની કોર્ટમાં ચાલી જતા ફરિયાદીના દીકરાને સજા થઈ હતી. આ ચુકાદાની સામે ફરિયાદીના પુત્રએ બનાસકાંઠા ડિસ્ટ્રીક્ટ એન્ડ સેશન્સ કોર્ટ, પાલનપુરમાં અપીલ કરી હતી. આ અપીલ મામલે મદદ કરવાના બદલામાં સેશન્સ કોર્ટના ઈન્ચાર્જ મદદનીશ સરકારી વકીલ નૈલેશભાઈ જોશીએ આરોપીના પિતા પાસેથી 1 લાખ રૂપિયાની લાંચ માગી હતી.

જોકે, ફરિયાદી આ રૂપિયા આપવા માગતા ન હોવાથી તેમણે એસીબીનો સંપર્ક કરી ફરિયાદ કરી હતી. જેના આધારે એસીબી, અમદાવાદ એકમના મદદનીશ નિયામક કે બી ચુડાસમાના સુપર વિઝન હેઠળ પીઆઈ વી આર વસાવા અને ખેડા એસીબી પોલીસ સ્ટેશનના સ્ટાફે આજે (ગુરુવાર, 12 ડિસેમ્બર) છટકું ગોઠવી ઈન્ચાર્જ મદદનીશ સરકારી વકીલને શહેરના જોરાવર પેલેસ રોડ પર આવેલા વિરાટ કોમ્પ્લેક્સમાં આવેલી ચાની લારી પાસે ફરિયાદી પાસેથી લાંચના 1 લાખ રૂપિયા લેતા ઝડપી લીધા હતા. એસીબીએ ઈન્ચાર્જ મદદનીશ સરકારી વકીલને ડિટેઈન કરી આગળની કાર્યવાહી હાથ ધરી છે.

દેશમાં હજુ પણ નાના-મોટા કામ માટે સરકારી કર્મચારીઓના ખિસ્સા ગરમ કરવા પડે છે. ત્યારે લોકો ન્યાય માટે એકમાત્ર કોર્ટ પર વિશ્વાસ રાખી રહ્યા છે. પરંતુ, કોર્ટમાં પણ કેસોનું એટલું ભારણ છે કે, ન્યાય મળતા વર્ષો લાગી જાય છે. તેવામાં હવે લોકોને ન્યાય અપાવવાનું જેમનું કામ છે તે વકીલો જ આ રીતે લાંચ લેવા જેવું ગુનાઈત કૃત્ય કરશે તો પછી લોકોએ કોના પર વિશ્વાસ મૂકવો તે સવાલ ઊભો થયો છે.