અબડાસામાં કોંગ્રેસના ઉમેદવારને પાછળ મૂકીને અપક્ષ બીજા નંબરે, ભાજપે બેઠક જીતી

બિહારની ચૂંટણી સાથે આજે ગુજરાતમાં યોજાયેલા 8 બેઠકોની પેટાચૂંટણીની પણ મતગણતરી ચાલી રહી છે જેમાં ભાજપના ખાતામાં તમામ 8 બેઠકો આવતી દેખાઈ રહી છે, જ્યારે ભાજપે 4 બેઠકો જીતી લીધી છે. ભાજપે અબડાસા, મોરબી, ગઢડા અને કરજણની બેઠકો પર વિજય મેળવી લીધો છે. જેમાં અબડાસા બેઠક પર કોંગ્રેસ ત્રીજા નંબરે આવી છે. જ્યારે બીજા નંબર પર અપક્ષ ઉમેદવાર રહ્યા છે. (તસવીરમાં મધ્યમાં હનિફ જાકબ)

સ્થાનિક મીડિયાના રિપોર્ટ્સ પ્રમાણે આંકડા પર નજર કરીએ તો અબડાસા બેઠક પર પ્રદ્યુમનસિંહ જાડેજાએ 39,119 મતો સાથે જીતનો ઝંડો લહેરાવી દીધો છે. જેમાં બીજા નંબર પર અપક્ષ ઉમેદવાર હનિફ જાકબ રહ્યા છે, જેમને 19,930 મત મળ્યા છે. જ્યારે કોંગ્રેસના ઉમેદવાર ડૉ. શાંતિલાલ સેંધાણી ત્રીજા નંબર રહ્યા છે અને તેમને કુલ 18,256 મત મળ્યા છે.

આ પેટાચૂંટણીમાં પ્રદ્યુમનસિંહ જાડેજાએ 46% કરતા વધુ મતોથી અબડાસા બેઠક પર કબજો કર્યો છે. જ્યારે હારેલા ઉમેદવારોને મળેલા મતની ટકાવારી જોઈએ તો અપક્ષ ઉમેદવાર હનિફ જાકબને 24 ટકા મત મળ્યા છે જ્યારે કોંગ્રેસના ઉમેદવાર શાંતિલાલને 21.28% મત મળ્યા છે. અબડાસાની પેટાચૂંટણીમાં 5 અપક્ષ ઉમેદવારો સહિત કુલ 10 ઉમેદવારો ચૂંટણી મેદાનમાં ઉતર્યા હતા. અપક્ષ ઉમેદવાર હનિફ જાકબે પોતાને મળેલા મતો અંગે ઉત્સાહ વ્યક્ત કરીને જણાવ્યું કે, પ્રજાએ મારામાં જે આત્મવિશ્વાસ મૂક્યો છે તે બદલ હું તેમનો આભારી છું અને આગામી સમયમાં તાલુકા પંચાયતની ચૂંટણી પણ લડીશું, અને 2022માં પણ બે-ત્રણ બેઠક પર લડીશું, પ્રજાએ મારામાં જે વિશ્વાસ મૂક્યો છે અને જે વચનો આપ્યા હતા તે પુરા કરવાની કોશિશ કરીશ અને જેમણે મત નથી આવ્યા તેમનો પણ વિશ્વાસ જીતવાની કોશિશ કરીશ.

આ તરફ બિહારમાં પણ ફરી એકવાર NDAની સરકાર બનતી દેખાઈ રહી છે. જ્યાં ભાજપના ખાતામાં 78, RJDને 65, JDUને 52 અને કોંગ્રેસને 18 બેઠકો પર આગળ ચાલી રહ્યા છે. હાલમાં દેખાઈ રહેલા ટ્રેન્ડ પ્રમાણે ભાજપ અને લાલુ પ્રસાદ યાદવની પાર્ટી આરજેડી વચ્ચે કાંટાની ટક્કર ચાલી રહી છે.

ગુજરાતમાં આઠ વિધાનસભા બેઠકો પર થયેલી પેટાચૂંટણીમાં ભાજપના જોરદાર પર્ફોમન્સને સીએમ રુપાણી ઘણાં આનંદિત દેખાયા, તેમણે ભાજપની કામગીરીની પ્રશંસા કરવાની સાથે આ ગુજરાતની પેટાચૂંટણીને ટ્રેલર ગણાવ્યું. તેમણે કહ્યું કે, આગામી સમયમાં આવી રહેલી મહાનગરપાલિકાની ચૂંટણીનું ટ્રેલર છે. રુપાણીએ જણાવ્યું હતું કે માત્ર ગુજરાતમાં નહીં, દેશમાં જ્યાં પણ હાલમાં ચૂંટણી થઈ ત્યાં બધે ભાજપનો વિજય થઈ રહ્યો છે.