હાર્દિક પટેલ અને દિનેશ બાંભણિયા ત્રણ દિવસ રિમાન્ડ પર

પાટણ: પાટણમાં મારામારી અને લૂંટની ફરિયાદમાં સમી કોર્ટે પાટીદાર અનામત આંદોલનના નેતા હાર્દિક પટેલ અને દિનશ બાંભણિયાના ત્રણ દિવસના રિમાન્ડ મંજૂર કર્યાં છે. સોમવારે બન્ને પાટીદાર નેતાઓની ધરપકડ કરાયા બાદ સમી પોલીસે કોર્ટમાં રજૂ કરવામાં આવ્યા હતા અને કોર્ટ સમક્ષ 10 દિવસના રિમાન્ડની માગણી કરવામાં આવી હતી જેની સામે કોર્ટે ત્રણ દિવસના રિમાન્ડ મંજૂર કર્યા છે. પાસના કન્વીનર હાર્દિક પટેલ અને દિનેશ બાંભણિયાની ધરપકડ કરી પાટણ જિલ્લાના સમી પોલીસ સ્ટેશને સોમવારે રાતથી જ નજરકેદ કરી દીધા હતા. મંગળવારે દિવસભર હાર્દિકના સમર્થકોના ટોળા પોલીસ મથક બહાર રહેતા ઉત્તેજના ભર્યો માહોલ છવાયેલો હતો. હાર્દિક અને દિનેશનાં ફિં્ગર પ્રિન્ટ તેમજ ફોટોગ્રાફની કાર્યવાહી સમી પોલીસ મથકમાં પૂર્ણ કરાઈ હતી. બપોરે હાર્દિક પટેલને પોલીસ સ્ટેશનમાં રોટલી, મિક્સ શાકભાજી અને દાળ-ભાતનું ભોજન આપવામાં આવ્યું હતું. મંગળવારે દિવસભર રાધનપુર એએસપી પાર્થરાજસિંહ ગોહિલ અને પાટણ બી ડીવીઝન પોલીસ સ્ટેશનનાં પીઆઈ જે.બી.પંડિત પણ સમી પોલીસ સ્ટેશનમાં હાજર રહ્યાં હતા. મીડિયાને દિવસભર હાર્દિક પટેલ સુધી પહોચવા દેવાયુ ન હતુ. મંગળવારે મોડી સાંજે હાર્દિક પટેલ, દિનેશ બાંભણિયાને રીમાન્ડ માટે કોર્ટમાં રજૂ કરી પોલીસે દસ દિવસના રિમાન્ડની માગણી કરી હતી.કોર્ટે બન્નેના ત્રણ દિવસના રિમાન્ડ મંજૂર કર્યા હતા.