ડીસામાં CAની પત્નીનું કારની ટક્કરે મોત કેસમાં ચોંકાવનારો ખુલાસો, પતિએ જ આપી હતી સોપારી

ડીસામાં આશરે એક મહિના પહેલા હનુમાનજીના મંદિરે પગપાળા દર્શને જતી CAની પત્નીનું માર્ગ અકસ્માતમાં મૃત્યુ થઈ ગયું હતું. હવે આ મામલે પોલીસની તપાસમાં ચોંકાવનારો ખુલાસો થયો છે. જેમાં ચાર્ટર્ડ એકાઉન્ટન્ટ પતિએ જ તેના મિત્રની મદદથી પોતાની જ પત્નીની કાર અકસ્માતથી હત્યા કરવા માટે સોપારી આપી હતી. પતિએ પત્નીના નામે ઉતરાવેલો કરોડો રૂપિયાનો વીમો પકાવવા માટે આ આખો પ્લાન બનાવ્યો હોવાની ચર્ચા થઈ રહી છે. હાલમાં પોલીસે આ CA પતિની અટકાયત કરીને વધુ તપાસ હાથ ધરી છે.

સ્થાનિક ન્યૂઝ રિપોર્ટ્સ મુજબ, ડીસાના બી.ડી. પાર્કમાં રહેતો ચાર્ટર્ડ એકાઉન્ટન્ટ લલિત ટાંક ગત 26મી ડિસેમ્બરે પત્ની દક્ષાબેન સાથે ગેળા ગામે હનુમાનજીના મંદિરે પગપાળા દર્શન કરવા જતો હતો. આ દરમિયાન વહેલી સવારે તેઓ એક જગ્યાએ આઇસ્ક્રીમ ખાવા ઉભા હતા. ત્યારે જ કારની ટક્કર વાગતાં દક્ષાબેનનું ઘટનાસ્થળે મોત થયું હતું. હવે આ કેસમાં મહિના બાદ ભીલડી પોલીસે મળેલા પૂરાવાઓના આધારે લલિત ટાંકની અટકાયત કરીને પ્રાથમિક પૂછપરછ કરતા પતિએ જ હત્યા કરાવી હોવાની કબૂલાત કરી લીધી હતી.

હાલમાં પોલીસે આ ગુનામાં લલિતને મદદ કરનારા મિત્ર અને કારચાલકની શોધખોળ હાથ ધરી છે. લલિત અને દક્ષાબેનને બે સંતાનો છે જેમાં ચાર વર્ષનો દીકરો આદિત્ય અને સવા વર્ષની દીકરી હિર છે. આ સમાચાર સાંભળતા જ પરિવાર સાથે જ સ્થાનિક લોકોમાં રોષ વ્યાપી ગયો છે.

કોલ ડિટેલ્સના આધારે પકડાયો હત્યારો પતિ
અકસ્માતની સમગ્ર ઘટનામાં દક્ષાબેનના પતિ લલિતનો વાળ પણ વાંકો નહોતો થયો, જેના કારણે પોલીસ પ્રબળ શંકાના આધારે તેના ફોન નંબરની ડિટેલ્સનું એનાલિસિસ કરતા પુરાવાઓ મળ્યા હતા. મૃતક દક્ષાબેનને પાછળથી કારની ટક્કર મરાવી મોત નીપજાવી ખૂન કર્યું હોવાનું બહાર આવ્યું હતું.

આરોપી પતિએ અકસ્માત બાદ સહાનુભૂતિ મેળવવા માટે પત્નીના મોત બાદ તેના આંખોનું દાન કર્યું હતું. જોકે સમગ્ર હત્યા પાછળ તેનો જ પ્લાન હોવાનું સામે આવતા ડીસામાં ચકચાર મચી જવા પામી હતી.