લ્યો બોલો, બનાસકાંઠામાં કોઈ ચાર-ચાર હાથીને રખડતા મૂકીને જતું રહ્યું!

અમદાવાદ: વાત માન્યામાં ન આવે તેવી છે, પણ સાચું છે. રાજ્યના સરહદી જિલ્લા બનાસકાંઠામાં ખરેખર કોઈ એક, બે નહીં પણ ચાર-ચાર હાથીને રખડતા મૂકીને જતું રહ્યું છે. તમને ઘણી વસ્તુઓ રસ્તે પડેલી બિનવારસી મળી હશે, પરંતુ અહીં તો લોકોને ચાર હાથી બિનવારસી મળ્યા છે! હાલ, તો વન વિભાગે હાથીઓને કબજામાં લઈ તેના માલિકની શોધખોળ હાથ ધરી છે.

કોરોના કાળમાં આપણે એવી અજબ ગજબ ઘટનાઓના સાક્ષી બન્યા છીએ કે જેની આપણે સપનામાં પણ કલ્પના ન કરી હોય. આવી જ એક ઘટના બનાસકાંઠામાં બની છે. અહીં દાંતીવાડાના સાતસણ ગામની સીમમાં મહાવત ફરતા ચાર હાથીને જોઈને લોકોમાં કુતૂહલ ઊભું થયું હતું, પહેલા તો ગામ લોકોને લાગ્યું કે, હાથીઓને સીમમાં ફરતા મૂકી મહાવત ક્યાંક આસપાસમાં જ ફરતા હશે. પરંતુ, લાંબો સમય સુધી કોઈ હાથીઓની આસપાસ ન દેખાતા, ગામ લોકો ચિંતામાં મૂકાઈ ગયા હતા. તેમને ખાસ તો એ વાતની ચિંતા હતી કે, જો હાથીઓ ગામમાં ઘૂસી આવશે અને તોફાન મચાવશે તો? આથી ગામ લોકોએ તાત્કાલિક પાંથવાડા ફોરેસ્ટ વિભાગને જાણ કરી હતી. વન વિભાગના કર્મચારીઓ તાત્કાલિક સાતસણ ગામે આવી પહોંચ્યા હતા અને હાથીઓને પોતાના કબજામાં લઈ લીધા હતા. દાંતિવાડા રેન્જના ફોરેસ્ટ ઓફિસર એસએલ પરમારે જણાવ્યું હતું કે, હાથીઓ માટે ઘાસચારા અને પાણીની વ્યવસ્થા કરી આપી હતી. સાથે જ તેમની આરોગ્ય ચકાસણી પણ હાથ ધરી છે કે, આ હાથીઓને કોઈ બીમારી કે અન્ય તકલીફ તો નથી ને?

આ હાથી અહીં કેવી રીતે આવ્યા, કોણ મૂકી ગયું એ વિશે કોઈને જાણ નથી. આજે સવારે ગામના લોકોએ સીમમાં આ ચાર હાથીઓને ફરતા જોયા હતા. રાજસ્થાનની સરહદે આવેલા આ ગામમાં અચાનક આવી ચડેલા ચાર હાથીઓએ ભારે આશ્ચર્ય સર્જ્યું છે. રાજ્યમાં મોટાભાગના હાથીઓ મંદિરો અને ધાર્મિક વડાઓની માલિકીના છે. પરમારે જણાવ્યું કે, હાથીઓને લગ્નમાં અને જાહેર પ્રસંગોમાં ભાડે પણ આપવામાં આવે છે, પરંતુ આ વિસ્તારમાં હાલના દિવસોમાં આવો કોઈ કાર્યક્રમ આયોજિત થયો નથી.

ગુજરાતમાં હાથીઓ માટે કોઈ રિઝર્વ વિસ્તાર નથી અને પ્રાકૃતિક રીતે રહેતા હોય તેવું સ્થળ પણ નથી. ત્યારે આ હાથીઓ આ અંતરિયાળ વિસ્તારમાં કઈ રીતે પહોંચ્યા અને તેમના માલિક કોણ છે તે અંગે તપાસ કરાશે તેમ જણાવતા રેન્જ ફોરેસ્ટ ઓફિસરે કહ્યું કે, જરૂર પડશે તો હાથીઓને રેસ્ક્યૂ સેન્ટરમાં મોકલી અપાશે.