અરવલ્લીઃ બાયડમાં પેટા ચૂંટણી પહેલા કોંગ્રેસના કાર્યકર્તાઓએ ઝડપ્યો દારૂનો મોટો જથ્થો

અરવલ્લીઃ બાયડમાં 21મી ઓક્ટોબરે વિધાનસભાની પેટા ચૂંટણી પહેલા મોટી સંખ્યામાં વિદેશી દારૂનો જથ્થો ઝડપાયો હતો. કોંગ્રેસનો આક્ષેપ છે કે આ દારૂ ચૂંટણીમાં વિતરણ માટે મંગાવાયો છે અને તેમાં પોલીસ પણ મદદ કરી રહી છે. આમ ચૂંટણીના ગણતરીના કલાકો પહેલા દારૂનો મસમોટો જથ્થો પકડાયા રાજકારણ ગરમાયું હતું. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: ગુજરાતમાં દારૂબંધીના દાવાની પોલ ખોલતો વિડીયો હાલ સોશિયલ મીડિયામાં વાઈરલ થઈ રહ્યા છે. કોંગ્રેસના નેતા ઘનશ્યામ પઢીયારે સોશિયલ મીડિયામાં એક પોસ્ટ સાથે કેટલાક વિડીયો પોસ્ટ કર્યા છે. જેમાં તેઓ કહી રહ્યા છે કે, બાયડમાં વિધાનસભાની પેટા ચૂંટણી પહેલા ભાજપના કદાવર મંત્રીના કહેવાથી પોલીસની દેખરેખમાં વિદેશી દારૂનો જથ્થો લવાયો હતો. તેમણે પોસ્ટ કરેલા વિડીયોમાં કોંગ્રેસના કાર્યકર્તા દારૂ ઝડપાયા બાદ પિકઅપ ચાલકને પૂછી રહ્યા છે કે આ દારૂ ક્યાંથી આવ્યો અને કોણે મોકલ્યો હતો. જેમાં ડ્રાઈવર કબૂલી રહ્યો છે કે દારૂમાં ઈસરી પોલીસ સ્ટેશનના PIએ મોકલ્યો છે. જોકે ડ્રાઈવર પિકઅપ વાનની અંદર શું ભરેલું છે તે વિશે તેને જોઈ જાણકારી નથી એમ કહીને બચવાનો પ્રયાસ કરતા દેખાય છે. કોંગ્રેસનો આક્ષેપ છે કે ચૂંટણીમાં વિતરણ માટે ભાજપ દ્વારા આ દારૂ મંગાવવામાં આવ્યો છે. પોલીસ દ્વારા હાલ સમગ્ર મામલે પિકઅપ વાન સહિત દારૂનો જથ્થો જપ્ત કરવામાં આવ્યો છે. આ સાથે એક ડ્રાઈવરની ધરપકડ કરાઈ છે, જ્યારે અન્ય એક ફરાર થઈ ગયો છે. ત્યારે આ દારૂ કોણે મંગાવ્યો અને તે ક્યાંથી આવ્યો આ મામલે પોલીસે તપાસ હાથ ધરી છે.