વિસનગરના વાલમમાં નજીવી બાબતે જૂથ અથડામણ, ફાયરિંગ

નવગુજરાત સમય > મહેસાણા

– વિસનગર તાલુકાના વાલમ ગામમાં શનિવારની સાંજે પાટીદાર અને ઠાકોર સમાજના લોકો નજીવી બાબતે હથિયારો સાથે સામસામે આવી જતાં દોડધામ મચી ગઈ હતી. સવારથી ચાલતા વિવાદને લઈને ગામમાં પોલીસ દોડી આવી હતી પરંતુ સાંજે બન્ને જૂથના બેફામ બનેલા ટોળોને વિખેરવા માટે ટીયરઞેસના શેલ છોડયા હતા. પરંતુ ટોળાએ વળતો પોલીસ ઉપર પથ્થરમારો કરતાં પોલીસે હવામાં ફાયરિંગ કર્યુ હતું. મોડી રાત સુધી ગામમાં ટોળાને વિખેરવા માટે કવાયત હાથ ધરી હતી.

વિસનગર તાલુકાના વાલમ ગામમાં શુક્રવાર રાત્રે કોઈએ પાટીદાર એકતા યાત્રાનું બેનર ફાડી નાંખ્યું હતું. જેને લઈ શનિવારે સવારથી આ મુદ્દે ગામમાં તણાવભર્યો માહોલ હતો. દરમિયાન મોડી સાંજે આ મુદ્દે ઠાકોર અને પાટીદારો હથિયારો સાથે સામ સામે આવી ગયા હતા. જોકે, પોલીસને જાણ થતાં જ દોડી આવી હતી અને બંને જુથોને અટકાવવા માટે પ્રયાસ હાથ ધરતાં ટીયરગેસના શેલ છોડયા હતા, જેથી પોલીસ ઉપર પથ્થરમારો શરૂ થયો હતો, બાદમાં પોલીસે હવામાં ફાયરિંગ કર્યુ હતું. બન્ને ટોળાને એકબીજાથી દૂર રાખવા માટે પોલીસનો કાફલો બંને જુથો વચ્ચે ખડકાઈ જતાં પરિસ્થિતિ શાંત પડી હતી. બીજી તરફ આ બનાવ બાદ કાંસા ચાર રસ્તા નજીક વાલમ તરફ જતી બસને રોકી ને સળગાવવાનો પ્રયાસ કરાયો હતો. જ્યારે બનાવને પગલે જિલ્લા પોલીસ વડા સહિતના અધિકારીઓ દોડી આવી શાંતિના પ્રયાસો હાથ ધર્યા હતા.