વિજાપુરમાં પટેલોની બહુચર્ચિત સ્વાભિમાન યાત્રાનો ફિયાસ્કો

નવગુજરાત સમય > મહેસાણા

– વિજાપુરમાં પાટીદાર અનામત આંદોલન સમિતિ દ્વારા વિજાપુરથી ગાંધીનગર સુધીની આયોજીત બહુચર્ચિત સ્વાભિમાન યાત્રામાં ૨૦ હજાર પાટીદારો જોડાશેના દાવા સામે બુધવારે માંડ ૨૦૦ જેટલા પાટીદારો પણ ન આવતા સ્વાભિમાન યાત્રાનો રીતસરનો ફિયાસ્કો થઈ ગયો હતો. તો બીજી તરફ સ્વાભિમાન યાત્રાને મંજૂરી આપવામાં આવેલી ન હોવાથી સવારથી જ વિજાપુરમાં પોલીસ બંદોબસ્ત ગોઠવી દેવામાં આવ્યો હતો. યાત્રામાં જોડાવા આવેલા પાસના ત્રણ અગ્રણીઓ સહિત 50 લોકોની અટકાયત કરવામાં આવી હતી.

વિજાપુર પાસ દ્વારા પાટીદાર સમાજની માંગણીઓ માટે બુધવારે વિજાપુરથી ગાંધીનગરની પાટીદાર સ્વાભિમાન યાત્રાનું આયોજન કરવામાં આવ્યુ હતું. આ યાત્રાને લઈ મહેસાણા પાસ દ્વારા લાંબા સમયથી આયોજનો અને રણનીતિઓ પણ ઘડવામાં આવી હતી. જોકે, સ્વાભિમાનયાત્રાને મંજૂરી મુદ્દે હાઇકોર્ટ સુધી ગયા હતા. સ્વાભિમાન યાત્રામાં 20 હજાર પાટીદારો જોડાશે તેવો દાવો કરવામાં આવ્યો હતો. બુધવારે પાટીદારોના દાવા બાદ આ યાત્રામાં માત્ર 200 જેટલા પાટીદારો પણ ન જોડાતા સ્વાભિમાન યાત્રાનો રીતસરનો ફિયાસ્કો થયો હતો. પાટીદારોની આ યાત્રા ને મંજૂરી આપવામાં આવેલી ન હોવાથી સવારથી જ વિજાપુરમાં પોલીસ બંદોબસ્ત ગોઠવી દેવામાં આવ્યો હતો. યાત્રામાં ભાગ લેવા માટે નીકળેલા મહેસાણા પાસ કન્વીનર નરેન્દ્ર પટેલ, અતુલ પટેલ, વરુણ પટેલ અને રેશ્મા પટેલની પોલીસે ધરપકડ કરી હતી. આ ઉપરાંત વિજાપુરમાંથી અન્ય 50 ની અટકાયત કરવામાં આવી હતી. કેટલાક પાટીદારોએ રસ્તાઓ વચ્ચે આડાશો મુકી રસ્તા રોકવાના પ્રયાસો કર્યા હતા જેને પોલીસે દુર કર્યા હતા. એક સમયે પાટીદારોની સ્વાભિમાન યાત્રાને લઈ અફવાઓએ પણ જોર પકડયું હતું.

પાસના કન્વીનર વરૂણ પટેલના જણાવ્યા અનુસાર અટકાયત બાદ પોલીસ દ્વારા કેટલાક પાટીદારોને ઢોર માર મારવામાં આવ્યો હતો. પોલીસના મારથી રામપુરા કુવાડવાના સતિષ પટેલ, કમલેશ પટેલ અને જીતુભાઈ પટેલ તેમજ વિજાપુરના અતુલ પટેલ વધુ ઈજાગ્રસ્ત થતાં ગાંધીનગર ખાતે સારવાર અર્થે ખસેડવાની ફરજ પડી હતી.