સાબરકાંઠામાં તૂટી પડ્યો ધોધમાર વરસાદ, ઘરોમાં ફરી વળ્યા પાણી

ગુજરાત પર મેઘરાજા મહેરબાન થયા છે, પાછલા કેટલાક દિવસથી રાજ્યમાં ઠેર-ઠેર વરસાદ થઈ રહ્યો છે. હવે સાબકાંઠામાં પણ સારા પ્રમાણમાં વરસાદ થઈ રહ્યો છે. સારો વરસાદ થતા ખેડૂતો આનંદની લાગણી વ્યક્ત કરી રહ્યા છે. જ્યારે કેટલાક સ્થળો પર ભારે વરસાદના કારણે રોડની નજીકમાં રહેતા લોકોની હાલત ઘરમાં પાણી ફરી વળવાના કારણે કફોડી બની છે.

ટીવી રિપોર્ટ્સ મુજબ સાબરકાંઠાના પ્રાંતિજમાં 3 ઈંચ વરસાદ થયો છે. ભારે વરસાદના કારણે સલાલ સહિતના નીચાણવાળા વિસ્તારોમાં પાણી ભરાઈ ગયા છે. ઘરની અંદર ઘૂંટણસમા પાણી ભરાઈ જવાના કારણે લોકોએ ભારે હાલાકીનો સામનો કરવો પડી રહ્યો છે. ઘરમાં ભરેલા વરસાદના પાણીને લોકો બહાર કાઢવાની કોશિશો કરી રહ્યા છે.

બીજી તરફ સાંબરકાંઠાના તલોદમાં પણ સવારથી ધોધમાર વરસાદ થઈ રહ્યો છે. સારા વરસાદના કારણે તલોદ પાસેથી પસાર થતી મેશ્વો નદીમાં નવા નીર આવ્યા છે. સારા વરસાદના કારણે ખેડૂતો આનંદ વ્યક્ત કરી રહ્યા છે.


અમદાવાદ સહિત આસપાસના વિસ્તારો અને સૌરાષ્ટ્ર, દક્ષિણ ગુજરાતમાં પણ વરસાદ થઈ રહ્યો છે. હવામાન વિભાગ દ્વારા આ અઠવાડિયું રાજ્યમાં વરસાદ રહેવાની આગાહી કરવામાં આવી છે. જેમાં 12 ઓગસ્ટથી રાજ્યમાં ભારેથી અતિભારે વરસાદ થવાની સંભાવનાઓ વ્યક્ત કરવામાં આવી છે.