વલસાડ: જનરલ સ્ટોર ચલાવતી મહિલાને વ્યાજે પૈસા લેવાનું ભારે પડી ગયું

વલસાડમાં જનરલ સ્ટોર ચલાવતી મહિલાને વ્યાજે પૈસા લેવાનું ભારે પડી ગયું. રૂરલ પોલીસ સ્ટેશનમાં નોંધાયેલી ફરિયાદ અનુસાર સુનિતા (નામ બદલ્યું છે)ને રૂપિયાની જરૂર હોવાથી વલસાડના નાના તાઈવાડ વિસ્તારમાં રહેતી બહેનપણી નરગીસ રિયાઝ શેખ મારફતે વ્યાજે નાણા ધિરતી નરગીસની સખી નસરીન ફરીદખાનનો સંપર્ક કરીને 50 હજાર વ્યાજે માંગ્યા હતા. નસરીને બે મહિનામાં 60 ચૂકવવાની શરતે સુનિતાને રૂપિયા વ્યાજે આપ્યા હતા. આ શરતે સુનિતાએ એક મહિનામાં 30 હજાર ચૂકવી દીધા હતા. જો કે, બીજા મહિને 30 હજાર નહીં ચૂકવી શકતા નસરીન ખાને વ્યાજ સાથે 1.63 લાખ રૂપિયા તૂકવવા અને એક મહિનામાં રૂપિયા ન આપે તો સીધા 2.10 લાખ ચૂકવવા પડશે તેવી ધમકી આપી હતી.

ફરિયાદ અનુસાર નસરીન અને નરગીસ શેખે ગત ઓગસ્ટ મહિનામાં સુનિતા પાસે બાકી નીકળતા રૂપિયા લેવા તેમની ત્રણ બહેનપણીઓના નામ બેંકમાંથી 1.80 લાખની લોન લીધી હતી. અને લોનના માસિક 10010 મુજબ બે વર્ષમાં 2 ટકાના વ્યાજ સાથે રકમ ચૂકવવા કહેતા સુનિતાએ ના પાડી હતી. દરમિયાન 25 નવેમ્બર 2022ના રોજ જ્યારે સુનિતા તેની દુકાન પર હતી ત્યારે શબનમ નામની મહિલા ધમકી આપીને જતી રહી હતી. એટલું જ નહીં, ફોન કરીને સુનિતાને કહેવામાં આવ્યું કે, ભાઈ આવે એટલે જે જગ્યાએ બોલાવે ત્યાં આવવા કહ્યું હતું.

ત્યારબાદ થોડીવાર પછી શબનમે ફોન કરીને સુનિતાને ચણવઈના કાઝી સ્ટ્રીટ પાસે બોલાવી હતી. થોડા સમયમાં ત્યાં ઈંગ્લિશનમાં કોબરા લખેલી કારમાં 60 વર્ષીય નાઝીમ કાઝી આવ્યો હતો. દરમિયાન નસરીન અને શબનમે સુનિતાના વાળ ખેંચીને ઝપાઝપી કરી હતી અને શારીરિક અડપલાં પણ કય્ હતા. તેમનું નસરીને તેનું ટોપ પણ ફાડી નાખ્યું હતું. ત્યારબાદ નાઝીમે પણ સુનિતાને જાનથી મારી નાખવાની ધમકી આપી હતી. જેથી સમગ્ર મામલે સુનિતાએ તમામ આરોપીઓ સામે રૂરલ પોલીસ સ્ટેશનમાં ફરિયાદ નોંધાવી હતી. જેના આધારે પોલીસે ગુનો દાખલ કરીને આગળની કાર્યવાહી હાથ ધરી છે.