CM વિજય રૂપાણીએ જાહેર કરી આટલી સંપત્તિ

I am Gujarat

વિજય રૂપાણીએ વાજતે-ગાજતે નોંધાવી ઉમેદવારી

ગુજરાત વિધાનસભાની ચૂંટણીનું 9 મી અને 14મી ડિસેમ્બર એમ બે ચરણોમાં મતદાન થવાનું છે ત્યારે રાજયના મુખ્યમંત્રી વિજય રૂપાણીએ રાજકોટ પશ્ચિમ બેઠક ઉપરથી આજે બપોરે વાજતે-ગાજતે ઉમેદવારી નોંધાવી હતી. તેમની સાથે કેન્દ્રના નાણામંત્રી શ્રી અરૂણ જેટલી સહિતના આગેવાનો હાજર રહ્યા હતા. ડેપ્યુટી કલેકટર શ્રી પ્રજ્ઞેશ જાની સમક્ષ વિજય રૂપાણીએ સોગંદનામુ રજૂ કર્યું હતું. જેમાં 7 કરોડની મિલ્કત જાહેર કરી છે. તેઓના ડમી તરીકે પૂર્વ મેયર જનકભાઇ કોટકે ફોર્મ ભર્યુ હતું.

સોગંદનામામાં જણાવી સંપત્તિ

સી.એમ વિજય રૂપાણીએ પોતાના સોગંદનામામાં પોતાનું નામ વિજય રમણીકલાલ રૂપાણી અને બી. એ., એલ. એલ. બી. સુધીનો અભ્યાસ કર્યો હોવાનું જાહેર કર્યું. સાથે 2016-17ના નાણાંકીય વર્ષમાં 18 લાખનું રીટર્ન તથા તેમના પત્નિ અંજલીબેને 3.50 લાખનું રીટર્ન ભર્યુ હોવાનું દર્શાવ્યુ. હાલમાં તેમની પાસે રોકડ 1.28 લાખ તથા તેમની પત્ની પાસે 73 હજાર હોવાનું જાહેર કર્યુ. બેંક, શેરમાં તથા અન્ય જગ્યાએ વિજયભાઈએ 46.49 લાખ તથા અંજલીબેને 1.45 કરોડનું રોકાણ કર્યુ હોવાનું પણ સોગંદનામામાં જણાવવામાં આવ્યુ છે. આ પણ વાંચોઃ રાજકોટમાં રૂપાણીના પ્રતિસ્પર્ધી ઈન્દ્રનીલ રાજ્યગુરુ પાસે છે આટલી બધી સંપત્તિ!

ક્યાં કેટલું કર્યું રોકાણ?

વિજય રૂપાણી તથા અંજલીબેને પીપીએફ અને એલઆઈસીમાં પણ રોકાણ કર્યાનું જાહેર કર્યુ છે. જેમાં સીએમનું પીપીએફમાં ૨ લાખ ૨૨ હજાર તથા એલઆઈસીમાં ૧૦ લાખ ૭૯ હજાર જયારે તેમની પત્નીનું બંનેમાં રોકાણ ૧૦ લાખ ઉપર કર્યાનું જાહેર કર્યુ છે.

સીએમ પર છે આટલા કરોડનું દેવું

સોગંદનામામાં વિજય રૂપાણી પર 21.34 લાખ રૂપિયાનું દેવું હોવાનું જણાવ્યું. જ્યારે તેમની પાસે જંગમ મિલ્કત 3.45 કરોડ અને પત્ની અંજલીબેન પાસે 1.98 કરોડ છે. સ્થાવર મિલ્કત વિજય રૂપાણીની 55 લાખ અને અંજલીબેનની 82 લાખ હોવાનું પણ દર્શાવાયુ છે. વિજયભાઈએ 73 લાખની લોન લીધી છે જયારે તેમના પત્નિ અંજલીબેને 9.69 લાખની લોન હોવાનું જાહેર કર્યુ છે.

આટલા કરોડની છે સંપત્તિ

બંનેની કુલ મિલ્કત 6.81 કરોડ હોવાનું જાહેર કર્યું. CM પાસે 14 લાખની કિંમતની ઈનોવા કાર તથા અંજલીબેન પાસે વેગનાર કાર છે, જેની કિંમત ૩ લાખ જેટલી દર્શાવાય છે. આ સાથે જ તેમની પાસે 383 ગ્રામ અને અંજલીબેન પાસે 14 લાખની કિંમતનું 486 ગ્રામ સોનુ હોવાનું પણ જાહેર કર્યુ છે.

સ્કૂટર પર બેસની પહોંચ્યા ઉમેદવારી નોંધાવા

ઉલ્લેખનીય છે કે સીએમ રુપાણી આજે બપોરે તેમના પત્ની સાથે કોમનમેનની જેમ ભાજપના વરિષ્ઠ અગ્રણી નિતીન ભારદ્વાજના સ્કુટર ઉપર પાછળ વિવિધ મંદિરોએ જઇ આશિર્વાદ લીધા હતાં. અને તે બાદ ઉમેદવારી ફોર્મ ભરવા ગયા હતા.