પાલનપુરઃ 32 લાખ રૂપિયાની ઉઘરાણી માટે આવનાર મિત્રની પત્ની પાસે મિત્રએ કરી બિભત્સ માગણી

Palanpur News: મિત્રતાના ધોરણે મિત્રને 32 લાખ રૂપિયા ઉછીના આપવા એક મિત્રને ભારે પડી ગયા હતા. ઉછીના પૈસા લીધા બાદ 6 વર્ષ વીત્યા હોવા છતાં પણ મિત્ર પૈસા પરત કરતો ન હતો. જેથી મુંબઈ ખાતે રહેતાં અને મૂળ પાલનપુરના રહેવાસી એવાં વેપારી અવારનવાર મિત્ર પાસે પૈસાની ઉઘરાણી કપવા પાલનપુર આવતા હતા. 11 એપ્રિલના રોજ વેપારી પોતાની પત્ની સાથે મિત્રની દુકાને પૈસાની ઉઘરાણી કરવા માટે આવ્યા હતા. ત્યારે વેપારીની પત્નીને એકલી જોઈ મિત્રએ તેનો હાથ પકડી ખુણામાં લઈ જઈ કહ્યું કે, તારે પૈસા જોઈએ છે તેમ કહી બિભત્સ માગણી કરી હતી. આ મામલે વેપારીની પત્નીએ પાલનપુર પૂર્વ પોલીસ સ્ટેશનમાં ફરિયાદ નોંધાવી છે. મુંબઈમાં શાંતાકુંજ વિસ્તારમાં રહેતાં વેપારી મૂળ પાલનપુરના રહેવાસી છે. વર્ષ 2016માં તેઓએ પોતાના પાલનપુર ખાતે રહેતાં અને દુકાન ચલાવતાં એક મિત્રને જરૂર હોવાથી 32 લાખ રૂપિયા ઉછીના આપ્યા હતા. 6 વર્ષના સમયગાળામાં મિત્રએ ધીમે-ધીમે 32 લાખમાંથી માત્ર સાડા ત્રણ લાખ રૂપિયા પરત આપ્યા હતા. જો કે, બાકીના પૈસા લેવા માટે વેપારીને અવારનવાર મિત્ર પાસે ઉઘરાણી કરવા માટે આવવું પડતું હતું. 11 એપ્રિલના રોજ તેઓ પોતાની પત્ની સાથે પાલનપુર આવ્યા હતા અને પૈસાની ઉઘરાણી માટે મિત્રની દુકાને ગયા હતા.

ઉઘરાણી માટે વેપારી આવતાં જ મિત્ર થોડીવારમાં સ્કૂટર લઈને ત્યાંથી નીકળી ગયો હતો. જેને કારણે વેપારી પણ પોતાની બાઈક લઈને મિત્રની પાછળ-પાછળ ગયા હતા. જો કે, મિત્રને ચકમો આપી મિત્ર પોતાની દુકાને પરત ફર્યો હતો અને દુકાને વેપારીની પત્નીને એકલી જોઈ હતી. જે બાદ મિત્રએ વેપારીની પત્નીનો હાથ પકડી તેને ગાળો બોલતો ખૂણામાં લઈ ગયો હતો. અને 'તારે પૈસા જોઈએ છે' એમ કહી વેપારીની પત્ની પાસે બિભત્સ માગણી કરી હતી.

પતિના મિત્ર દ્વારા કરવામાં આવેલી આ હરકતથી મહિલા ડઘાઈ ગઈ હતી. તેણે પોતાના બચાવ માટે બૂમો પાડવાનું શરૂ કરી દીધું હતું. મહિલાની બૂમો સાંભળતાં જ આરોપી મિત્ર ત્યાંથી ફરાર થઈ ગયો હતો. જો કે, આ મામલે મહિલાએ પતિના મિત્ર વિરુદ્ધ પાલનપુર પૂર્વ પોલીસ મથકમાં ફરિયાદ નોંધાવી છે. પોલીસે ફરિયાદના આધારે તપાસનો ધમધમાટ શરૂ કર્યો છે.