ભુજ : હબાય ગામમાં આહીરોના બે જૂથ વચ્ચે હિંસક અથડામણ, 1નું મોત, 5 ઘાયલ

I am Gujarat

ભુજના હબાયનો બનાવ

ભુજ તાલુકાના હબાય ગામમાં આહીર સમાજના બે જૂથો વચ્ચે થયેલી હિંસક અથડામણમાં એક વ્યક્તિનું કમકમાટીભર્યું મોત નીપજ્યું છે જ્યારે અન્ય પાંચ વ્યક્તિઓને ગંભીર ઈજાઓ થઈ છે. મૃતક વ્યક્તિની ઓળખાણ હરી લક્ષ્મણભાઈ કેરાસિયા તરીકે થઈ છે. ઈજાગ્રસ્તોને સારવાર માટે ભુજની ખાનગી હોસ્પિટલ શ્યામ મેડિકેરમાં લઈ જવામાં આવ્યા છે.

બોલાચાલીથી હિંસામાં ફેરવાયો ઝઘડો

બંને જૂથો વચ્ચે ભુજ-માધાપર હાઈવે પર આવેલા દિપક પેટ્રોલ પંપ સામે આજે સવારે બોલાચાલી થઈ હતી જે બાદમાં હિંસક બની હતી અને બંને ટોળાઓએ ઘાતક હથિયારો સાથે એકબીજા પર હુમલો કર્યો હતો. આ ઝઘડા પાછળ જૂની અદાવત હોવાનું કહેવાઈ રહ્યું છે.

ઘણા વખતથી ચાલે છે મતભેદ

સૂત્રોના જણાવ્યા મુજબ થોડા સમય અગાઉ યોજાયેલી સરપંચપદની ચૂંટણી વખતથી બંને પક્ષો વચ્ચે મતભેદો હતા અને અગાઉ પણ ઘણી વખત ઝઘડો થઈ ચૂક્યો છે. જન્માષ્ટમીની ઉજવણી વખતે પણ બંને પક્ષો વચ્ચે આવી જ કોઈ બોલાચાલી થઈ હતી જે આખરે હિંસામાં ફેરવાઈ હતી અને તેનું ગંભીર પરિણામ આવ્યું હતું.

ઈજાગ્રસ્તો સારવાર હેઠળ

ઈજાગ્રસ્ત લોકોને હાલ સારવાર આપવામાં આવી રહી છે. તેમને ભુજની એક ખાનગી હોસ્પિટલમાં એડમિટ કરાયા છે.