ભાજપના પૂર્વ જિલ્લા પ્રમુખે હાઈકોર્ટના માસ્ક ના પહેરવા બદલ 1000 રુપિયાના દંડને અમાનવીય ગણાવ્યો

કોરોના વાયરસના ફેલાવાને રોકવા માટે ઘણાં દેશોમાં રસીની શોધ ચાલી રહી છે, આવામાં કોરોનાથી બચવા માટે સોશિયલ ડિસ્ટન્સિંગ અને માસ્ક સૌથી મહત્વના ગણવામાં આવી રહ્યા છે. આવામાં ગુજરાતમાં માસ્કની રકમની વધારવા માટે ખુદ ગુજરાત હાઈકોર્ટ દ્વારા આદેશ કરવામાં આવ્યો હતો. જે બાદ માસ્ક ના પહેરીને નિયમનું ઉલ્લંઘન કરનારી વ્યક્તિને 1000 રુપિયાનો દંડ ફટકારવાનો નિર્ણય રાજ્ય સરકાર દ્વારા કરવામાં આવ્યો હતો. જોકે, આ નિયમના વિરોધમાં ભાજપ પૂર્વ જિલ્લા પ્રમુખ મેદાનમાં આવ્યા છે.

અમરેલીના ભાજપના પૂર્વ પ્રમુખ ડૉ. ભરત કાનાબારે માસ્કની રકમ સામે વિરોધ કરીને હાઈકોર્ટના આદેશને અમાનવીય ગણાવી દીધો છે. તેમણે આ હુમક રદ થવો જોઈએ તેવી વાત પણ કરી છે. તેમણે ટ્વીટ કરીને આ પોતાનો મત રજુ કર્યો છે.

ડૉ. કાનાબારે ટ્વીટ કરીને લખ્યું છે કે, "કોરોનાની વર્તમાન સ્થિતિમાં જાહેરમાં માસ્ક વગર નીકળવું તે સમાજવિરોધી કૃત્ય છે તે કબૂલ, પણ વિકરાળ આર્થિક મુશ્કેલીઓ વચ્ચે ઝઝૂમી રહેલ આમ આદમીને માસ્ક ન પહેરવાની ભૂલ માટે 1000 રૂપિયાનો આકરો દંડ કરવાનો ગુજરાત હાઈકોર્ટનો હુકમ પણ સંપૂર્ણપણે અમાનવીય ! હુકમ રદ કરાવો જોઈએ." તેમણે પોતાના ટ્વીટમાં વડાપ્રધાન નરેન્દ્ર મોદીને ટેગ પણ કર્યા છે.

નોંધનીય છે કે, વિજય રુપાણીએ 11 ઓગસ્ટથી હાઈકોર્ટના આદેશ બાદ જાહેરમાં માસ્ક ના પહેરનારી વ્યક્તિ પાસેથી 1000 રુપિયા દંડ કરવામાં આવશે તેમ જણાવ્યું હતું.