સ્પર્ધાત્મક પરીક્ષામાં ડમી ઉમેદવાર તરીકે બેસતા લોકો પર ભાવનગર પોલીસની તવાઈ,36 સામે ફરિયાદ

ભાવનગર: વિદ્યાર્થી નેતા યુવરાજસિંહે 5 એપ્રિલના દિવસે ડમી ઉમેદવાર કાંડનો પર્દાફાશ કર્યો હતો અને 4 ડમી ઉમેદવારોના નામ પણ જાહેર કર્યા હતા. ત્યારે આ મામલે મહત્વના સમાચાર સામે આવ્યા છે. ભાવનગર પોલીસે એક બે નહીં કુલ 36 ડમી લોકોને શોધી નાંખ્યા છે. આરોપી વિરુદ્ધ LCBના ઈન્ચાર્જ PI બી.એચ.શીંગરખીયાએ ફરિયાદ નોંધાવી છે.મળતી માહિતી અનુસાર, વિદ્યાર્થી નેતા યુવરાજસિંહે 5 એપ્રિલના રોજ 4 ડમી વિદ્યાર્થીના નામ જાહેર કર્યા હતા. જેમાં પશુધન નિરીક્ષક વર્ગ-3ની પરીક્ષામાં ભાવેશ જેઠવાની જગ્યાએ મીલન ઘૂઘાભાઈ, પશુધન નિરીક્ષક વર્ગ 3ની પરીક્ષઆમાં કવિ રાવની જગ્યાએ મીલન ઘૂઘાભાઈ તથા ગ્રામસેવક વર્ગ 3ની પરીક્ષામાં અંકિત લકૂમની જગ્યાએ વિમલ તથા ગ્રામ સેવક વર્ગની પરીક્ષામાં જપદીપ રમણાની બદલે કલ્પેશ પંડ્યાએ પરીક્ષા આપી હતી. યુવરાજસિંહે ડમીકાંડનો પર્દાફાશ કર્યો ત્યારે રાજ્ય સરકારે તપાસના આદેશ આપ્યા હતા. સમગ્ર મામલે ભાવનગર પોલીસ ખૂબ ઉંડાણપૂર્વક તપાસ કરવામાં આવી હતી. મળતી જાણકારી મુજબ, 2012થી 2023 સુધીની સ્પર્ધાત્મક પરીક્ષા સહિત પરીક્ષાઓમાં ઉમેદવારની હોલ ટિકિટ તથા આધારકાર્ડ ઉપરના ફોટા સાથે ચેડા કરીને ડમી ઉમેદવાર બેસડવામાં આવ્યા હતા. આવા કુલ 36 ડમી ઉમેદવારોને ઝડપી પાડવામાં આવ્યા છે.

2016 પછીની તમામ ભરતી પ્રક્રિયા ચેક કરાય: યુવરાજસિંહ
સમગ્ર ડમી ઉમેદવારના કાંડને પર્દાફાશ કરતા યુવરાજસિંહે કહ્યુ હતુ કે, આ કૌભાંડ કરવા માટે સૌ પ્રથમ ફોટો મર્જ કરવામાં આવે છે. ઓજસમાં જ્યારે ફોર્મ ભરવામાં આવે ત્યારે આજ ફોટોનો ઉપયોગ કરવામાં આવે છે. ત્યારબાદ જે ઉમેદવાર ડમી તરીકે બેસવાનો હોય તે પોતાનું આધારકાર્ડ ખોટું બનાવે છે અને તેનો ઉપયોગ કરે છે. આ ઉપરાંત જે નામો જાહેર કરવામાં આવ્યા હતા તે તમામ ઉમેદવારોને ક્રોસ ચેક કરવાની માગ કરવામાં આવી હતી.ખાસ કરીને 2016 પછીની તમામ ભરતીમાં પાસ થયેલા ઉમેદવારોને ક્રોસ ચેક કરવામાં આવે.