ધ્રોલઃ ત્રણ મકાન છતાં 20 વર્ષથી એક ઓરડીમાં રહેતા હતા વૃદ્ધા, નિર્વસ્ત્ર હાલતમાં મળી આવ્યા

તાજેતરમાં જ રાજકોટમાં બે ભાઈ અને એક બહેન 10 વર્ષથી એક જ ઓરડીમાં રહેતા હતા અને તેમને બહાર કાઢવામાં આવ્યો તે કિસ્સો સામે આવ્યો હતો. તેવો જ એક બીજો કિસ્સો ધ્રોલમાં સામે આવ્યો છે. ધ્રોલમાં 60 તોલા સોનુ, ત્રણ મકાન હોવા છતાં 65 વર્ષીય વૃદ્ધા છેલ્લા 20 વર્ષથી એક જ ઓરડીમાં એકલવાયુ જીવન જીવતા હતા. રાજકોટના સાથી સેવા ગ્રૂપમાં જલ્પાબેન પટેલે અને તેમની ટીમે કંચનબેન મગનભાઈ પીપળીયા નામના વૃદ્ધાને બહાર કાઢ્યા હતા. સાથી સેવા ગ્રુપે ઓરડીમાં જોયું ત્યારે કંચનબેન નિર્વસ્ત્ર હાલતમાં હતા અને તેમના વાળ 8 ફૂટ જેટલા વધી ગયા હતા.

સાથી સેવા ગ્રુપે કંચનબેનને બહાર કાઢ્યા હતા ત્યારબાદ તેમને ખવડાવ્યું હતું. બાદમાં તેમના વાળ કાપીને તથા નવડાવીને નવા કપડા પહેરાવવામાં આવ્યા હતા. જલ્પાબેને બાદમાં કંચનબેનના ભત્રીજાને ફોન કરીને તેમનો સંપર્ક કર્યો હતો પરંતુ પરિવારજનોએ તેમને સ્વીકારવાની ના પાડી દીધી હતી. તેના કારણે સાથી સેવા ગ્રુપે કંચનબેનને બીજા દિવસે સુરતના માનવ મંદિર આશ્રમ મોકલી દીધા હતા. કંચનબેનના પગ લાંબા સમયથી વળી ગયા હતા તેના કારણે તે સીધા થઈ શકતા નથી.
આ અંગે જલ્પાબેને જણાવ્યું હતું કે કંચનબેને લગ્ન કર્યા ન હતા અને તેઓ એક જ ઓરડીમાં એકલવાયુ જીવન જીવતા હતા. તેમની આસપાસ રહેતા લોકો તેને જમવાનું આપી જતા હતા. પાડોશીના જણાવ્યા પ્રમાણે કંચનબેન છેલ્લા 15 વર્ષી ન્હાયા ન હતો અને તેમની પાસે 60 તોલા સોનુ હતું.

પરિવારજનોએ તેમની સ્વીકારવાની ના પાડી દીધા બાદ તેની સારવાર થાય અને તેમને ભોજન મળી રહે તે માટે સુરત માનવ મંદિર આશ્રમમાં મોકલવામાં આવ્યા છે. સુરત માનવ મંદિર આશ્રમે સોશિયલ મીડિયામાં એક વિડીયો વાઈરલ કરીને લોકોને જણાવ્યું હતું કે આશ્રમના દરવાજા તમામ લોકો માટે હંમેશા ખુલ્લા છે.