દ્વારકાધીશના દર્શન કરીને પરત ફરતા નડ્યો અકસ્માત, યુવતી સહિત 4ના મોત

દ્વારકાના ધ્રેવાડ નજીક એક ટ્રક અને કાર વચ્ચે અકસ્માત સર્જાયો હતો કે જેમાં કુલ 4 લોકોના મોત નીપજ્યા છે. આ અકસ્માતમાં એક ટ્રકે અલ્ટો કારને ટક્કર મારતા 3 વ્યક્તિના ઘટનાસ્થળે અને એક યુવતીનું સારવાર દરમિયાન મોત નીપજ્યું છે. પ્રાપ્ત માહિતી મુજબ, અલ્ટો કારમાં સવાર પરિવાર દ્વારકાધીશના દર્શન કરીને પરત ફરી રહ્યો હતો ત્યારે આ અકસ્માત સર્જાયો હતો. આ અકસ્માતમાં કારનો કચ્ચરઘાણ નીકળી ગયો હતો અને કુલ 4 લોકોના મોત નીપજ્યા છે.

દ્વારકાના ધ્રેવાડ નજીક એક ટ્રક અને કાર વચ્ચે સર્જાયેલો આ અકસ્માત એટલો ભયાનક હતો કે કારમાં સવાર લોકો અંદર જ ફસાઈ ગયા હતા અને કારના પતરા કાપવા પડે તેવી સ્થિતી પેદા થઇ હતી. અકસ્માતની આ ઘટનાની જાણ થતા આસપાસના લોકો દોડી આવ્યા હતા અને તે લોકોએ કારની અંદર ફસાયેલા લોકોને બહાર કાઢ્યા હતા. જેમાં ત્રણ વ્યક્તિનું ઘટનાસ્થળે અને યુવતીનું હોસ્પિટલમાં સારવાર દરમિયાન મોત નીપજ્યું હતું.

હાઈવે પર સર્જાયેલા આ અકસ્માતના કારણે હાઈવે પર ટ્રાફિકજામના દ્રશ્યો સર્જાયા હતા. ટ્રકચાલક ઘટનાસ્થળેથી ભાગી ગયો હતો. પોલીસે અકસ્માત મોતનો ગુનો દાખલ કરીને વધુ તપાસ આદરી છે. ટ્રકની નંબર પ્લેટના આધારે વધારે તપાસ ચાલુ છે. જ્યારે તમામ મૃતદેહોને પોસ્ટમોર્ટમ માટે સિવિલ હોસ્પિટલ ખાતે ખસેડવામાં આવ્યા છે.